Departamento di Salubridad Publico, e siman aki tin como tema Hepatitis. E palabra hepatitis ta un palabra masha grandi, cu ta nifica basicamente cu e higra tin inflamacion, segun Dr. Natasha Jreige Iskandar kende ta specialista den higra.
E higra por haya inflamacion pa motibo di hopi cos. Por ehempel na Aruba, alcohol ta un di e causanan principal cu ta ocasiona inflamacion den higra. Tambe tin obesidad ta ocasiona hepatitis. Esaki ta ora cu un pashent tin hopi sobrepeso y e vet ta wordo deposita den e higra y esaki na su turno ta causa inflamacion y na final sirosis. E problema cu tin cu hepatitis, ta un proceso agudo of por ta e mayoria di biaha, un proceso cronico. Si e proceso cronico ta keda den e curpa den un persona, ta daña e higra di un manera ireversibel.
Pero tin un tempo, si por reconoce e malesa y por trata e malesa, cu por reverti. Pero tin un momento den cual cu e inflamacion ta sigui y ta causa un malesa den e higra cu ta yama sirosis. E sirosis no ta un proceso reversibel. No tin tratamento na Aruba pa esaki. Tin hopi otro causa cu por causa Hepatitis manera HIV. No ta algo cu por evita. E ta un malesa cu ta autoinmuno, cual ta ataca e higra. Tin tambe hepatitis viral. Hopi virus manera Hepatitis A, Hepatitis B, Hepatitis C, D y E, por causa tambe inflamacion den e higra.
Hepatitis A y B por preveni cu un vacuna. Sinembargo Hepatitis C no por preveni cu vacuna. Por wak cu hende ta haya transfusion di sanger of comparti hangua cu uzo di droga endovenosa. Pero afortunadamente awo tin un tratamento hopi novedoso cu hasta AZV ta cubri pa e tratamento di Hepatitis C.
E dokter a menciona cu no tin data, pero na Aruba e dos problemanan principal ta alcoholismo, cu ta algo cu por traha riba dje y obesidad, cu tambe ta algo cu por traha riba dje. Si por maneha e diabetes y e peso, mantene nos mes den movecion, por evita cu e vet cu ta deposita den e higra, ta causa sirosis den dje. Alcoholismo porsupuesto ta un malesa cu por controla y evita.
Desafortunadamente si un pashent desaroya sirosis, na Aruba no tin manera pa yuda. Debi cu sirosis si e ta bira instabil, mester di un transplante di higra y aki na Aruba no tin servicio di transplante di higra.
