Hopi ta e comentarionan tanto riba rednan social como den combersacionan entre colega y famia cu ta condena un di e ultimo decisionan di Gobierno. Ta trata specificamente riba e regla nobo cu na bo mesun cas bo no por ricibi ningun bishita. Esaki ta inclui famia. Na mas cu un ocasion ta puntra te unda Gobierno di Aruba lo bay pa cu limita derechonan di un ciudadano. Expertonan legal ta di opinion cu e medidanan no ta den linea cu e cantidad di caso positivo cu Aruba tin. Durante 2020 Aruba tabata conta cu un cantidad di caso positivo mas halto y no tabata tin un medida similar. Comentarionan manera : ‘Awor mi no por bishita mi wela, mi mama mas’ , ‘Esaki a bay mucho leu’ , ‘Nos pueblo ta mucho manso’ ta echo frecuentemente entre diabierna y diasabra. Tambe por a lesa otro comentarionan critico cu ta comparti cu nan kier mira kende lo bin drenta e cas di su mayornan pa strobele di bishita su famia.
Apesar cu tin mas di 10 mil persona vacuna ta sinti cu nos ta bayendo mas atras den e derechonan fundamental di cada ciudadano.
Recientemente Raad van Advies tambe a declara cu Gobierno no por sigi impone e diferente reglanan/protocol via di e decreto di emergencia. Esaki ta debi cu esaki tin 1 aña caba tumando lugar y un decreto di emergencia no mester fungi como un instrumento pa duracion largo.
