Den cu carta manda na ministernan Glenbert Croes, Dangui Oduber y Crisis Team, Aruba Food & Beverage Association (AF&BA) a pidi gobierno formalmente pa nan revoca e medidanan nobo encuanto e cantidad di cliente (maximo dos persona) cu por sinta hunto na un mesa di restaurant.
Ta un hecho conoci cu Aruba a experiencia pieknan sin precedente den caso y variantenan nobo di Coronavirus. Sinembargo mester tene na cuenta cu e restaurantnan no ta culpabel di aumento di casonan, specialmente pasobra mayoria di e restaurantnan ta traha den colaboracion estrecho cu DVG, den aplicacion di e condicionnan operativo y protocol.
P’esey, segun e asociacion, ta sinti cu ta inhusto pa sanciona cu tal medidanan. E asociacion ta kere firmemente cu e control di area unda cu no ta sigui e regulacionnan di siguridad di COVID lo conduci na resultado, sin limita esunnan cu ya ta siguiendo e protocol di gobierno.
Por lo tanto tur restaurant, aplicando e protocol di DVG, mester ta capas pa ubica personanan paden, te cu 4 (sin conta muchanan bao di 12 aña) y pafo 6 (sin conta muchanan bao di 12 aña), na luga di sinta solamente cu dos huesped na mesa, solamente ta limita ainda mas e capacidad di asiento pa restaurant. Ta hopi probabel cu debi na e medida aki e restaurantnan lo kibra.
Loading…
Reload document
Open in new tab Ademas, e medida nobo aki lo tin un impacto negativo den turismo. Operadornan di restaurant ya ta haya pregunta y/of cancelacion pasobra e turistanan tin miedo di no por sinta na e mesun mesa cu nan yiunan adolescente.
Cu medidanan manera esaki, sali bay come lo bira algo di pasado: famianan lo keda cas poniendo na peliger centenares di cupo di trabao den e industria di F&B, ya cu e medidanan aki lo tin un impacto devastador den e capacidad pa opera negoshinan.
Segun e carta, AF&BA colectivamente a presenta esaki na consideracion: permiso pa sinta cuater huesped (riba 12 aña) paden na un mesa y seis huespued (riba 12 aña) na un mesa pafo cu medidanan di proteccion.
Por ultimo AF&BA ta ofrece den e carta, pa traha den colaboracion estrecho cu gobierno y e ekipo di administracion pa yuda resolve/preveni problema cu por surgi den futuro, relaciona cu e medidanan cu por tin consecuencia den e industria di alimento y bebida riba e isla.
