A yega na oido di Arubahuis cu lo tin un grupo di studiante di Aruba cu recientemente a yega Hulanda lo ta organisando un fiesta bou di nan mes. Minister Guilfred Besaril a manda un mensahe pa nan cu esaki ta algo cu no ta aceptabel.
E Minister a comunica via un rueda di prensa cu si e logra di haya mas detaye e lo denuncia e actividad aki na autoridadnan competente na Hulanda. Segun e tip cu a drenta e studiantenan lo kier organisa esaki den un di e edificionan unda e studiantenan ta biba. Esaki ta debi cu pronto scol lo cuminsa y nan no lo tin tempo pa topa otro.
Pa loke ta un update riba e cantidad di caso positivo bou di e studiantenan cu a caba di yega Hulanda for di Aruba por informa cu actualmente tin 9 caso positivo. Ainda falta pa haya resultado di dos studiante. E Minister tambe a haci un apelacion na e studiantenan cu a bay test sin conocemento di Arubahuis pa nan por informa Arubahuis riba e resultadonan. Esaki ta importante pa asina informa otro persona cu tabata tin contacto cu nan pa nan tambe bay test si ta necesario.
