Un grupo di boluntario a lanta pa yuda e comunidad di Aruba, specificamente esnan cu a perde trabou y no tin nada di come. Hunto cu hopi boluntario a logra yega na e meta aki. A lanta un luga cu por duna nan algo di come. Jean Marc Antersijn, lider di e grupo di boluntario, ta biba na Amsterdam y a yega Aruba 4 siman atras, unda el a mira hopi reto riba Instagram y Facebook. Esaki a pone cu el a dicidi di lanta un reto cu ta impacta hende nan bida. Ta duna nan cuminda y ta duna nan algo cu nan por aprecia.
El a bin cu e grupo di boluntario aki y no ta algo di un biaha so. E kier pa esaki sigui y mira cua ta otro pasonan por sigui pa yuda hendenan den e crisis aki. Te cu awo nan a ricibi carganan di donacion di companianan, pero e pueblo di Aruba tambe a haci donacion y a busca nan na e adres. Esaki ta algo bunita cu ainda tin hende por y kier duna na hendenan cu no tin.
Segun Jean Marc Antersijn, hopi hende ta traha cu e grupo di boluntario manera Annalot Meijers, kende ta yuda cu un lista. E tin contacto cu famianan y tin añanan ta yuda nan cu cuminda, cushina pa nan lunch. Un dia el a bay yud’e y a ripara cu e señora tin un lista, unda cu nan tambe por yuda. Por tuma contacto via yamada of whatsapp riba e number di 5666375. Asina akie grupo di boluntario por duna detaye, ta pone riba listanan y mira con nan ta bin na remarca pa tur donacion ricibi.
Tin pregunta cu a bin dilanti si hende por haci donacion cash, pero segun Antersijn, nan a mira cu hopi hende di Hulanda y di Aruba kier yuda door di duna cash. Loke e mes tabata haci personal tabata busca e donacion na cas, pasobra door cu nan no ta un fundacion oficial ainda nan mester ta hopi cauteloso con pa handle esaki pasobra ta trata di placa. Nan kier haci esaki na miho manera posibel con pa sigui cu e proceso ey pa tuma donacion di placa.
E ta pidi Aruba pa sigui duna donacion pasobra e cos ta bay bira pio. Esaki ta e prome luna di e crisis y e ta pidi pa pasa laga e donacion y si no por tuma contacto cu nan. El a sigui bisa cu e lo percura pa tin boluntarionan cu lo yega te na cas pa por haci algo otro. Companianan cu kier yuda y tin productonan over, pa laga nan sa pa donacion. E grupo di boluntario aki t’ey pa’bo y p’e pueblo di Aruba cu mester di dje.
