Otorgamento di plach’i number di aña 2020 ta diferente e aña aki

13036

Departamento di Impuesto ta participa cu e otorgamento di plach’i number 2020 na publico ta diferente e aña aki. Considerando e medidanan vigente pa mitiga e riesgo di contagio cu COVID 19, Departamento di Impuesto a opta pa cuminsa otorga plach’i number 2020 na e sector comercial y sector publico.

Ta bon pa tene na cuenta cu e proceso di otorgamento pa empresa ta bay a base di afspraak y conforme nos plan di contingencia COVID-19. Pa haci uzo di e servicio, e empresa mester manda un e-mail na [email protected] cu e lista di number di auto, nomber di e persona di contacto y un number di telefon en caso mester comunica cu e persona aki. E documentonan necesario manera comprobante di pago original y polisa di seguro vigente lo mester wordo entrega conforme afspraak. Departamento di Impuesto lo duna e empresa e instruccion necesario pa ora di busca e pakete.

Mientrastanto gerencia ta preparando pa otorga e plachinan na e forma mas diligente y responsabel na e grupo mas grandi di persona individual pa asina nan tambe por haya nan plachinan di number nobo. E partimento den forma personal na publico manera antes, no lo tuma lugar. Manera a ser menciona anteriormente, Departamento di Impuesto ta sigui cu e plan pa brinda e servicio di entrega te na porta di cas. Esaki no ta cla. Actualmente ta preparando e infrastructura, cual ta depende di otro partidonan tambe, unda mester tene cuenta cu e deber legal pa controla e seguro. Ora ta asina leu, Departamento di Impuesto lo duna mas informacion al respecto. Por lo pronto e oficina na edificio anexo na Camacuri, caminda ta busca plach’i number, ta habri solamente pa empresa. Pa registracion di vehiculo di motor of pa entrega plach’i, por acudi na oficina principal na Camacuri, parti mainta entre 7:45 y 11:30, cerca nos caheronan. Departamento di Impuesto ta pidi su clientenan pa tuma bon nota di e participacion aki pa evita cualkier inconveniencia.