Aruba Trade & Industry Association (ATIA), Kamer van Koophandel (KVK) y Aruba Hotel And Tourism Association (AHATA) ta drenta un reunion awe merdia pa 2:00pm cu Minister di Infrastructura di Gobierno, Otmar Oduber, relaciona cu su maneho ambicioso di desperdicio. E Minister kier presenta su ideanan na comercio, specialmente su maneho di W2E, esta “Waste to Energy” pa cual e ta insisti pa bin cu un Incinerator pa nos isla.
Parce cu siman pasa ATIA a manda un carta pisa pa e mandatario, exponiendo nan puntonan di preocupacion den maneho di e mandatario. Ta tene cuenta cu posibel aumento den “cost of doing business” cu ya ta halto caba, den un economia bastanye fragil y pega. Mas gasto, sea directo of indirectamente no ta aprecia na e momento aki.
Riba dje ta sinti cu tin mas alternativa riba mesa actualmente, cu lo costa menos, sin inversion miyonario mara na dje y cu menos efecto na nos medio ambiente. Tur hende ta di acuerdo cu e maneho anticua di benta sushi riba dump y despues peg’e na candela no ta funciona mas y no ta deseabel tampoco.
Aruba tin un problema di desperdicio pasobra nos ta importa casi tur cos pa nos ciudadanonan y e riba 1 miyon turista cu yega anualmente nos isla pa vakantie. Tur e sushi ey ta bay caba riba un sero na Parkietenbos, cu tur consecuencia pa medio ambiente y salud publico. Den esey comercio ta convenci cu mester un cambio di maneho, pero esey no por ta mara na un opcion costoso y cu toch ta keda cu efecto riba medio ambiente.
Minister ta bogando pa bin cu un incinerator, cu lo costa algun shen miyon florin. Gobierno ta bisa cu nan lo no paga pe, pues e ora ta comunidad y comercio lo mester paga pa e inversion ey, cu por nifica triplifica e “tipping fee” actual di 180 florin pa ton. Di otro banda EcoGas a firma un MoU cu Argos pa exporta e desperdicio procesa di Aruba, den forma di envirobales, pa uza como combustibel den forno pa procesa cement na Colombia. E solucion ey ta garantisa cu no ta bin aumento riba e “tipping fee”.
