Boardwalk Boutique Hotel Aruba su reapertura oficial a tuma luga riba diabierna, 15 di November, cu un ceremonia festivo, atendi pa Minister di Turismo Dangui Oduber, CEO di Aruba Tourism Authority (ATA)  Ronella Tjin Asjoe-Croes, y Tisa LaSorte, CEO y Presidente di Aruba Hotel & Tourism Association (AHATA).

Hunto cu propietarionan di e hotel Boardwalk, e morochonan naci na Aruba Kimberly y Stephanie Rooijakkers, Minister Oduber a asisti den e ceremonia di cortamento di cinta, marcando di e forma aki e apertura oficial di e propiedad, cu henter e stafff di e hotel presente. Algun minuut despues, e prome huespednan, Kenneth Navarro y Lupe Leito di Corsou a check-in den e propiedad completamente renoba.

Grandioso re-apertura di Boardwalk como Boutique Hotel

Grandioso re-apertura di Boardwalk como Boutique Hotel. Click e link pa mas https://24ora.tv/37ctdj7

Posted by 24ora on Saturday, November 16, 2019

E hotel propiedad y maneha pa e famia, a agrega 32 casitas riba tereno cu un tempo tabata plantacion di coco, conoci como Plantage Tromp, ademas di un pool, facilidad di ehercicio y spa, un lobby masha acogedor y un lobby cafe intimo.

E 14 casitanan espacioso existente a wordo renoba y remodela. “Nos a haci nos maximo esfuerso den e diseño y lay-out di e propiedad amplio, pa mantene nos caracteristica Caribense unico y mantene e sensacion relahante intacto. A integra mas tanto toke local posibel,” Kimberly Rooijakkers, un di e propietarionan di e hotel a expresa. “Tur e casitanan nobo ta manera e asina yama “Green Houses”, construi cu materialnan insula Nudura y Insuldeck, uzando panelnan solar, sistemanan energia ultra eficiente y 100% luznan LED. Tur esaki pa mehora e operacion di e hotel cu ta “eco-friendly”,” Rooijakkers a agrega.

A ehecuta e expansion di Boardwalk Boutique Hotel den dos aña y mey, cu un inversion di 10 miyon dollar (Mericano), den colaboracion cu diferente contratistanan local y cooperacion di partnernan local manera Coburg Construction (Project Management);  Claudia Ruiz-Vasquez (interior and conceptual design), Fantastic Gardens y Caribbean Drip (landscape design and landscaping services), Ecoled (lighting) y  Crystal Pool (pool installation), Banjolux (tur e bañonan) y Berloni (pa e cushinanan). Aruba Aloe ta provee producto pa tur e bañonan den un empake “eco-friendly” y arte local di Fundacion Arte Sano y otro artistanan local a contribui na e decoracion interior di e casitanan.  

Huespednan por aloha den diferente suitenan intimo yama Coco Casita, den Casitanan grandi di un of dos camber, den un Casita priva, of acomodacionnan estilo palaba ofreciendo un bista pa lama espectacular y un teraza completamente cera. Cuater di e Coco Casitanan tin un mural pinta na man, ilustrando e flora y fauna local, como tambe “shower” extra pafo di e bañonan.

E signatura di e pationan di e boutique hotel, barbecue grill y hamacanan ta poni na cada casita, como tambe sala amplio completamente ekipa, cushina y stovenan moderno. E 32 casitanan nobo (adicional) ta extende e oasis di coco di Boardwalk, agregando mas areanan pafo pa sinta lesa of relaha. E pool ta brinda e huespednan diferente tipo di experiencia y pa henter e famia. Tin decknan intimo, hamaca, diferente caracteristicanan di uzo na e pool, servicio diario na e bar eynan, pero tambe tin un piscina pa mucha.

Un di dos pool ta ofrece un area separa den un oasis exurbetante, mientras cu e facilidadnan completamente nobo di gym ta ofrece opcionnan manera practica di yoga.

Boardwalk Boutique Hotel, celebrando su 30 aniversario e aña’ki, consistentemente ta na no. 2 di TripAdvisor su categoria di Aruba Hotel na Palm / Eagle Beach y den nan Top 25 di Best Caribbean Hotels pa Servicio. E hotel ta un propiedad familiar y maneha pa Kimberly y Stephanie Rooijakkers desde 2011, tin un staff local di 20 persona. Pa mas informacion www.boardwalkaruba.com.

Comments

comments