Tanto diabierna, diasabra como diadomingo ultimo e federacion di volleyball, Aruba Volleyball Association a tene nan campeonato di beach volleyball den Joe Laveist Ballpark. Despues cu siman pasa a clausura un exitoso campeonato di volleyball indoor na Centro Deportivo Betico Croes e sigui mesora cu e campeonato di volleyball
di playa den e categorianan di semi-pro dama y cabayero como tambe U-16. Diabierna a inicia den oranan di atardi cu e torneo den U-16 cual a wordo gana pa e duo Mali/Isabela mientras na di dos lugar a keda Brayaden/Keanu. Pa su majan diasabra mainta a inicia cu e torneo den e categorianan semi-pro. Mester bisa cu e
weganan den dama y cabayero tabata tremendo unda nos a mira weganan di bon nivel presenta pa nos atletanan di beach volleyball. Diadomingo e weganan a continua unda a hunga e rondanan eliminatorio como tambe e finalnan. Pa loke ta e resultadonan final nos mester bisa cu den dama semi-pro e ganadornan a bira e duo Shaira/Mali mientras na di dos lugar a keda Charlotte/Judeska. Den e categoria semi-pro cabayero e ganadornan a resulta Elmerlindo Robles de Medina/Brian Howell mientras cu Fransua Angela y Gino Hogde a keda na di dos lugar. E deporte di Beach Volleyball tabata un cu den e ultimo anjanan a representa Aruba varios biaha den exterior cu Eargenell de Cuba y Mitchell Daniel kendenan tabata nos hungadornan
elite. Ambos hungador despues a bay studia den exterior mientras a cay un gap chikito despues di nan partida. Pero awor AVA ta trata na re-emplasa cu atletanan nobo pa rebiba e deporte di beach volley na Aruba. Un danki sigur na Lotto, e Loteria di Aruba pa medio di St. Sportsubsidie Aruba cu a subsidia torneo di beach volleyball organisa pa AVA. Cumprando weganan di Lotto, e Loteria di Aruba bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e St. Sportsubsidie Aruba.
