Minister di Asunto Social y Labor, Glenbert Croes, a cera un acuerdo cu UNICEF pa yuda Aruba logra garantisa mas siguridad pa muchanan. Despues di un “quick scan” di UNICEF for di 13 pa 23 di augustus ultimo, nan a conclui cu Aruba mester di asistencia den crea un sistema di proteccion pa muchanan. UNICEF lo participa activamente den asisti Aruba den e reto aki cu nos mesun Departamento di Asuntonan Social no a logra, tampoco cu fondo adicional den e Crisis Plan.
Puntonan cu a resalta den e ‘quick scan’ di UNICEF a haci ta:
1. Tin un necesidad grandi pa cambia norma y conducta riba criansa di nos muchanan.
2. A resulta cu hopi mayor y welonan ta pidi ayudo y apoyo con pa atende cu muchanan cu ta dificil, hasta violento
3. Acceso entre servicio- y departamentonan ta bay cu hopi dificultad. Mester un miho cooperacion entre departamento- y instancianan.
4. No tin registracion ni data riba casonan cu tin di haber cu mucha
5. Legislacion riba proteccion y husticia pa mucha mester wordo investiga y adapta pa sigura proteccion contra abuso y negligencia.
6. Mester di mas instancia unda por ubica un mucha victima di abuso sexual y negligencia
7. Servicio pa muchanan cu adiccion, pa muchanan cu mester di guia psyciatrico ta masha limita na Aruba
Ta riba e puntonan aki Unicef cu Aruba lo traha hunto pa por yega na solucionnan sostenibel y duradero.
Minister Glenbert Croes, ta tene semper na cuenta e tragedia cu a rementa den nos cara na 2017 unda cu dos criatura a fayece como victima di violencia. Ta e momento ey cu Gobierno a haci’e su mision pa ofrece proteccion na muchanan. Ta pa e mandatario inaceptabel cu abusadornan ta sali liber pa fayonan tecnico of falta di prueba.
Gobierno kier logra ta e ‘vangnet’ social familiar como tambe e ‘vangnet’ legal pa nan proteccion. “It takes a village to raise a child’ pues ta un responsabilidad cu ta toca nos tur como mama, tata, ruman, omo, tanta, abuelo, amigo y bisiña pa cuida y proteha nos muchanan. Bo wak algo inusual raport’e di biaha na Bureau Sostenemi cu awo tin yamada gratis na telefon 588-1010.
E mandatario ta contento cu e logro aki ya cu UNICEF y Aruba lo logra hunto e maximo proteccion pa tur mucha.
