Gobierno a yama un rueda di prensa extraordinario pa informa riba e situacion di tempo. Te cu awo e ta un tropical wave y diamars ta spera cu e status por cambia, di cual ta sigui su desaroyo di cerca.
Prome minister mr. Evelyn Wever-Croes a expresa cu tin un menasa di ciclon tropical cu ta yegando Aruba. E mandatario ta pidi pa comunidad keda pendiente pa noticia local. E status di e tempestad ta un tropical wave, y no ta un tropical depression ainda pasobra e no tin circulacion cera. Awo su status oficial ta un ciclon tropical potencial.
Si encaso e haya e circulacion necesario y te bira un depresion, despues tropical storm. Pa awo ta premira cu e ta pasa entre Aruba y Venezuela, pero segun e mandatario e por cambia. Den ora di mañan ta spera cu e status por cambia y bira un tropical storm. Segun Wever-Croes, nan no por determina esey, pero National Hurricane Center lo avisa nan di esey. Ta spera mal tempo cu ta yega Aruba diaranson den careda di 8:00 pm, e ora ey por sinti e bientonan fuerte.
Ta spera cu tin hopi awasero, pero esaki por bin prome. E awasero aki por dura te diabierna. E mandatario a expresa cu nan ta preocupa p’e awasero y kico e por trece cu ne. Incluso gobierno ta preocupa p’e erosion di e beachnan, mirando cu e ta pasa net n’e banda entre Aruba y Venezuela. Pa loke ta lama, a conseha pa saca e botonan chikito y no aventura. Desde awe nochi caba por spera yobida.
E ciclon tropical potencial no tin circulacion ainda, pero na momento cu e haya esey por siguie miho, ki caminda e ta tuma y cu cuanto yobida e ta bin. E no ta un status di watch ainda, pero ta pendiente di National Hurricane Center p’esaki, pero ta kere cu mañan ta haya notificacion. Diaranson anochi por sinti e efectonan y esaki por keda te diabierna.
Gobierno a reuni cu crisis team p’asina ta bon prepara. Pa ta bon prepara mester di e comunidad tambe pa esey. DOW a haci e rooinan limpi y p’esey ta pidi pa comunidad no tira nada den e rooinan, pasobra esey lo causa molester pa otro hende. E mandatario a duna diferente tip pa yuda mantene e rooinan limpi, pero tambe pa mira no tin obheto cu por bula y causa daño.
Pa mas lesa TREMPAN.COM.
