Tur cos ta mustra, si e tendencia di rebaho den prijs di petroleo keda mesun cos, cu pa otro luna lo tin un rebaho substancial den prijs di gasolin na Aruba. Esaki Minister di Asunto Economico, mr. Geoffrey Wever, a anuncia un rato pasa durante manifestacion di e chauffeurnan di autobus. E mandatario a expresa su preocupacion pa e aumento constante di prijs di combustibel, pero a sigura e chauffeurnan cu mucho gobierno no por haci. E aumento na Aruba ta bin como un consecuencia directo debi na fluctuacion di e tarifa internacional.
“Pero si nos mester pone prijs awe, mirando cu pa algun dia caba e bari di petroleo a baha bou 100 dollar, cu e prijs di gasolin na Aruba lo baha cu 30 cen y diesel lo baha cu 28 cen pa liter. Claro, por bin cambio ainda den e dianan nos dilanti, sea e prijs por sigui baha mas ainda of por aumenta. Pero te cu awor, tur cos ta mustra cu otro luna lo baha e prijs drasticamente aki na Aruba.
E luna aki di juli 2022, e prijs acorda ta 335,7 cen p/ltr. (+ 14,5 cen) pa gasolin unleaded-premium, mientras cu un liter di diesel ta costa awe 312,7 cen p/ltr. (+ 22,4 cen) y kerosin ta costa 291,1 cen p/ltr. (+ 13,5 cen). E prijsnan ta inclui BBO/BAZV/BAVP.
Ta bon pa splica cu nos a habri aña 2022 cu e tarifa di gasolin na 239 cen pa liter. Awe, e prijs ey a subi te na 335.7 cen pa liter, cu ta nifica un aumento di 96.7 cen pa liter e aña aki so. Pues, e noticia cu tur cos ta mustra cu lo baha e prijs pa otro luna, sin duda ta bonbini pa tur automobilista. Specialmente esunnan cu ta stuur hopi, manera bus, trucknan di entrega, taxi, etc., ta sinti e diferencia den prijs y ta come den nan margen di ganashi.
E echo cu prijs di gasolin na Aruba ta mas caro cu Corsou, tambe ta un asunto cu hopi no por compronde. Aruba y Corsou ta cumpra e mesun gasolin for di Trinidad & Tobago, pero toch esun di Aruba ta mas caro. Na Corsou automobilistanan ta paga 295 cen pa liter, mientras cu Rubianonan ta paga 335.7 cen pa e mesun liter di gasolin. Riba esaki Minister Geoffrey Wever a sigura cu e diferencia ta cu Corsou ta calcula su prijs cada dos luna, mientras cu na Aruba ta recalcula prijs tur luna. Pues, na momento cu e aumenta na Aruba, cu nos rumannan na Corsou lo sinti e diferencia te despues di dos luna. Sinembargo, e mandatario no a menciona nada cu na Corsou si a baha “accijnzen” riba gasolin, locual Gobierno di Aruba no a logra haci.
