Gobierno di Aruba tin un acuerdo cu Hulanda cu lo spaar 12 miyon na personal. Por a sinti for di Prome Minister cu e no ta bay facil. Minister di Finansas, mr. Xiomara Ruiz-Maduro no tin intencion di manda hende cas, aunke e ehercisio aki ta uno dificil.
https://www.facebook.com/24ora/videos/296064617651914/
Hopi aña, sigur 8 aña a pasa di cual decisionnan importante pa e pais aki no a wordo tuma, caminda cu no tabatin e decencia di mira ki daño ta haci ora cu bo keda sin tuma decision y cu esaki, mas bo alarg’e, claramente mas dolor e ta haci ora cu bo tin cu yega na e toma di decision, asina Minister Ruiz a duna di conoce.
Awor aki sigur Gobierno ta atendiendo cu e parti aki y segun e mandatario, dia 30 di Augustus, e lo ta den Parlamento y eynan, na man di e cifranan, e kwartaal raportagesnan tambe, cual CFT a haya y ta duna su comentarionan riba dje. Lo bay brinda e informacion corecto riba kico tur ta bay haci.
Pa loke ta e parti di personal, esaki lo bin tambe den locual ta presupuesto 2019 di nos pais, cual ta kedando cla. E no ta wordo entrega prome cu 1 di September, pa e motibo hustamente di e parti aki di personal. Awor aki den presupuesto tin cu wak no solamente e norma pa e deficit, pero tambe e norma pa locual ta trata gasto di personal. Esey ta e ehercisionan cu ta haci, cu ta trece e ora ey contrario na tur otro presupuesto cu pais Aruba a yega di conoce. Den e presupuesto aki tin cu hinca e parti aki di norma y ta tuma su tempo cun’e, pasobra tin cu streamline cierto cosnan pa decisionnan por tuma luga y esaki ta tuma su tempo.
Peso di personal
E peso di personal ta asina pisa den e aparato gubernamental y a manda varios hende cas, cu tabata tin contract y no a renoba y a linknan cu e gobernacion anterior. Por sinti cu tin mas hende drentando den e aparato gubernamental cu aprobacion di e gobierno actual. Segun e mandatario, no ta un secreto cu sigur e gobierno anterior a hinca un cantidad di persona den e aparato gubernamental. E no ta un secreto tampoco cu na momento cu nan a bay, a laga un cantidad di decision atras, cu nan no tabata tin e decencia di laga esey over pa e gobierno cu a bin sinta. Nan ta tuma den e parti dimesionario. Y prome cu esey tambe, den e parti cu ta considera como afscheidsbeleid. Eynan ta caminda cu conseho di minister a tuma decision na December, si ta alarga of no ta alarga. Esey a tuma luga, manera tur gobierno pa e operacion por sigui. Claramente tin hendenan cu bo ta tuma. Tin cu tene na cuenta tambe cu e gobierno aki tabata tin tambe hendenan cu ya caba e tempo eynan nan papelnan tabata den proceso y esaki a tuma luga. Pesey awor aki mas cu claro e presupuesto ta tardando, pasobra mester a haci loke a bira e ehercisio aki, pa asina por tin sigur locual ta e departamento di recurso humano, tambe locual ta e departamento di finansas, pa nan dos ta riba un liña, pa por tin e informacion cu ta hunto cu otro pa asina eynan e decision cu conseho di minsiter tuma, ta un decision cu tin tur e informacion necesario.
E ta tuma su tempo. Ta un ehercisio grandi. E ta pa prome biaha cu sigur ta haci esaki. Wak e parti positivo na dje. Aruba awor aki ta conoce un gobierno cu ta tuma decision y den esaki e ora eynan ta trece tur e departamentonan hunto, pa asina por tuma un decision cu ta balansa, pa ora di presenta tambe algo bo por argumenta tambe pakico bo ta tuma cierto decisionnan y bo por brinda e transparencia tambe den esey.
Ambtenaar
Minister Ruiz-Maduro a splica cu na Aruba e gobierno cu tabatin pa 8 aña, nan a laga tur loke ta normalidad, a desvia di esey. Awor aki tin un gobierno cu tin cu traha banda di locual cu ta e cosnan di custumber, tin cu bay pa por bay bek pa haci ehercisionan pa trece cosnan bek na normalidad den e pais aki. Ta un reto hopi grandi, pasobra e daño cu e gobierno saliente a haci, ta uno hopi grandi.
