Minister Dangui Oduber, encarga cu maneho di Turismo, Salud Publico y Deporte, awe merdia a reacciona riba e sentencia cu a cay awe mainta den e caso sumario cu e Hunta di Supervision di Stichting Fundacion Lotto pa Deporte. Manera ta conoci, Corte a suspende e decision pa retira e miembronan y a suspende e decision pa nombra e miembronan nobo. E mandatario no a keda contento cu e sentencia y a anuncia cu e lo apela.
E sentencia awor aki no ta nifica cu Lotto a gana, sino cu awor Gobierno no por retira e directiva wardando e caso den bodemprocedure cu mester cuminsa den 4 siman. Locual si e ta haci, segun e Minister, ta stroba ehecucion di su maneho pasobra e sa cu e no por conta pa nada cu e directiva aki. E ta acusa nan di ta liga na AVP, por ehempel Benvinda de Sousa ta casa ta e politico Desiree Croes di AVP.
Minister Oduber a sigura cu e tin hopi plan, pero no por ehecuta nan si no por conta cu Lotto. Un di su plannan ta pa traha un Little League Ballpark na Dakota. E kier mira Lotto nenge, specialmente awor cu Canadian Bank Note a informe cu nan ta aloca 600 mil florin pa aña na e directiva. Minister Oduber kier sa kico ta sosode cu e placa aki.
Di otro banda, e directiva a laga sa caba e siman aki cu nan NO ta hayando 600 mil florin na salario. Ta paga como 300 mil florin pa aña na Tele Aruba pa pasa e sorteonan tur dia, dos biaha pa dia. E miembronan ta haya 2 mil florin pa luna y e Presidente 3 mil florin pa luna. Tambe tin algun gasto di administracion y explotacion.
E Minister a aclaria cu CBN no a bise si cu e directiva ta cobra 600 mil na salario, pero e kier sa ki fiesta nan ta haciendo cu e placa aki, mientras cu deportistanan ta para canto di caminda bende rifa pa yega na fondo. Un miembro di directiva a bisa nos cu si e Minister reuni cu nan, e lo haya sa unda e placa ta bay, pero 5 carta di peticion pa reunion ainda no a haya contesta tampoco!
E mandatario a finalisa bisando cu Hues no a tene cuenta cu statutonan di Lotto sino a expresa su opinion personal den e sentencia. E Hues ta complice na perhudica deporte, esey tabata palabranan di e Minister di Deporte, cu a bisa cu lo evalua ainda cu abogadonan con lo sigui awo. E ta kere cu lo apela pero mester check si e apelacion lo bin despues di e caso den bodemprocedure, pasobra esey lo no bale la pena.
Minister Dangui Oduber obviamente no a keda contento cu e sentencia di Hues Sap, pasobra e no por compronde con e Magistrado ta vocifera den su sentencia cu e ta kere cu Lotto lo gana den e caso di bodemprocedure tambe….pues e Minister ta puntra su mes dicon e no a dicta sentencia den e caso di bodemprocedure di biaha anto?!
