Riba diaranson mainta, Gobernador di Aruba, S.E. Alfonso Boekhoudt a realisa un bishita di trabou na Cruz Cora Aruba. E bishita a tuma luga den cuadro di e brote di coronavirus (COVID-19). Durante su bishita, Gobernador a papia cu entre otro, e boluntarionan, trahadonan y miembronan di directiva di Cruz Cora Aruba y a informa su mes riba e manera con nan ta atende cu e retonan cu e situacion di crisis ta trece cune.
Durante un recorido di e facilidad, Gobernador Boekhoudt a haya splicacion di e varios trabounan cu Cruz Cora ta realisa den cuadro di e crisis di coronavirus. Por ehempel, actualmente Cruz Cora ta percura pa partimento di cuminda y caha di alimento di e “Meals on Wheels Program”. Ademas, cu e “Proyecto Asistencia Social”, Cruz Cora ta brinda asistencia social door di duna digital-coupon (e-vouchers) pa cuminda y producto di higiena. E proyecto aki tambe ta brinda acceso na cuido di salud y remedi na e personanan cu a keda afecta door di crisis di coronavirus. Tambe Cruz Cora Aruba a digitalisa su proyecto pa nos grandinan, unda awor un amigo (buddy) ta yama nos grandinan solitario tur siman.
Pa medio di e combersacionnan telefonico y, si ta posibel, bishitanan di trabou, Gobernador Boekhoudt ta informa su mes tocante e consecuencianan di e brote di coronavirus y ta expresa su apoyo y aprecio pa e esfuerso di hopi persona den e lucha contra e pandemia. Ta tuma medida, den consulta cu e organisacionnan involvi, pa asina e bishitanan di trabou por tuma luga na un manera sigur.
