Feliz dia di Mama pa tur nos Mamanan
Diadomingo awor ta dia di Mama , den un palabra bisa tur dia ta dia di mama, pero riba e fecha di diadomingo awor nos tur ta celebra un fiesta special pa e ser mas keri cu a trece nos na mundo.
Tur hende tin un mama biologico y un tata biologico, y aunke kico cu pasa den bida nan no por wordo cambia.
Un mama of un tata por nenga un yiu via di ley ,of un rechaso profundo den Famia, pero nunca nan por kita e marca di Dios den nan bida cu e yiu ey ta di nan.
Beibel ta conta nos di un historia masha special di un yiu cu su mama a hañe cu dolor, y pesey su mama a yame Jabes, cual ta nifica dolor. Pero den 1 Cronicas 4;9 beibel ta siña nos lo siguiente: Jabes tabata mas honorable cu su ruman hombernan, y su mama a yame Jabes bisando: Pasobra ta cu dolor mi a hañe . Y awor Jabes a invoca e Dios di Israel bisando; O cu Abo lo bendicionami di berdad y haci mi teritorio mas grandi, y cu bo man lo ta cu mi , y cu Abo lo wardami di malo, pa pena no tocami.Y Dios a dune loke e a pidi.
Cu un simpel oracion Jabes a trece un cambio den su bida y normalmente e cambio mester a bini den bida di su mama, pasobra ta imposibel cu un yiu por lubida riba su mama ora cu situacion drecha pe.
Hopi biaha den nos curazon nos ta anhela hopi cos y nos ta carga hopi speransa den cosnan material, y mientras nos ayudo ta den man di Dios.
Hopi ta wordo planea sin corda cu Dios ta doño di tur cos, hasta ora hende ta malo nan kier tur sorto di opinion, pero poco biaha ta corda cu nos Sanador ta Hesus Cristo.
Awor aki mes durante e virus aki, miyones ta wordo inverti pa traha un vacuna, pero poco ta wordo bisa cu nos ta pidi Dios duna nos sabiduria pa por inventa un vacuna. Pasobra hende kier tur fama pa nan mes y no kier duna e Gloria na Dios
Nos kier probecha e momento special aki pa desea tur Mama den Reino Hulandes un feliz dia di mama.
Pero tambe nos kier pidi tur yiu pa corda riba nan mama.Pasobra awor mas cu nunca nos mester pone atencion na nos mama . especial esnan cu tin e na bida. Nos mester mantene distancia social, pero con nos lo practica distancia social for di esun cu a trece nos na mundo.
Tin hopi hende cu lagrima na wowo, pasobra nan a priminti nan mama cu ta den exterior un bishita, pero pa awor esaki lo no ta posibel.
Diadomingo awor si ta na bo alcance bishita bo mama aunke bo tin cu wanta diStancia social, no manda un app di dia di mama, segun bo forsa dune su regalo, haci tur loke ta posibel pa bo dune un dia bendiciona, si bo mama ta biba den exterior no laga nada strobabo di manda algo pe, pa asina den e tempo dificil aki bo cumpli cu mandato di Dios pa Honra bo Tata y bo Mama di un forma digno, pa tur cos bay bo bon y pa bo tin bida largo riba e mundo aki.
Tin hopi nomber pa mama, tin ta bisa, Mamai, Mami. Mama. Ma. Mamuchi,pero tur esaki ta e expression di respet cu nos tin pa nos mama.
Sea bendiciona tur Mama riba nan dia, y Dios bendiciona tur yiu cu ta aprecia y Honra nan Mama.
Nos oracion ta pa Dios bendiciona tur mama rond mundu, y cu e paz y favor di Dios permanece riba nan.
FORTALEZA PA FAMIA. Scirbi pa Pastor Marcel Balootje.
