Desaroyo monetario
Compara cu januari 2020, e cantidad di placa den circulacion a crece cu Afl. 92, 5 miyon te na Afl. 4.689,7 miyon den e luna di februari 2020. Esaki a resulta for di un subida den tanto e activo domestico netto (+Afl. 49,1 miyon) y den e reserva di divisa netto (+Afl. 43,4 miyon).
E expansion den e componente domestico pa cu e cantidad di placa den circulacion ta relata na e aumento den credito domestico (+Afl. 55,7 miyon) y un bahada den transaccionan no relata na credito (-Afl. 44,3 miyon). Esaki a wordo causa door di aumento den ambos credito bancario netto na e sector publico (+Afl. 32,1 miyon) y credito bancario na e sector priva (+Afl. 11,4 miyon). E crecemento den credito bancario netto na e sector publico tabata door di un reduccion den deposito di gobierno (-Afl. 44,2 miyon). Tambe, credito na empresa (+Afl. 7,0 miyon) y hipoteca pa vivienda (+Afl. 5,6 miyon), mientras credito na consumidor a baha (-Afl. 1,1 miyon).
Den februari 2020, e reserva di divisa di e sector bancario a subi causa pa e compra netto di divisa for di publico (+Afl. 260,0 miyon), principalmente relaciona cu entrada genera for di turismo. Esaki a wordo grandemente neutralisa pa benta netto di divisa na publico (-Afl. 216,6 miyon), mas tanto relaciona cu pago pa importacion di mercancia, otro inversionnan, y otro servicionan.
Inflacion
E nivel general di prijs, cu ta wordo midi door di e indice di prijs di consumo, a registra un subida di 4,2 porciento den e luna di februari 2020, compara cu februari 2019. E contribuyente principal na e aumento aki tabata e componentenan “Recreacion y Cultura”, “Cuminda y Bebida No-Alcoholico”, y “Transporte”. Pa loke ta trata e promedio anual di e tasa di inflacion, esaki a registra 4,6 porciento na februari 2020, compara cu 4,4 porciento na januari 2020.
Entrada di Gobierno
Entrada total di gobierno a suma Afl. 97,7 miyon na februari 2020, cual ta Afl. 4,2 miyon mas cu e mesun luna di e aña anterior. Esaki a resulta for di un subida den entrada di impuesto (+Afl. 9,2 miyon) y un caida den entrada no relata na impuesto (-Afl. 5,1 miyon).
E expansion den entrada di impuesto a wordo causa principalmente pa mas entrada riba e asina yama “transfer tax” (+Afl. 7,7 miyon), impuesto riba vehiculo di motor (+Afl. 4,6 miyon), y impuesto riba divisa (+Afl. 1,3 miyon). Di otro banda, entrada for di impuesto riba ganashi (-Afl. 2,6 miyon) y accijns riba tabaco (-Afl. 1,2 miyon) a nota un bahada.
Turismo
Tuma nota cu e cifranan di turismo di estadia no tabata disponibel na momento di publicacion di e relato aki.
