Recientemente a tuma nota di un grupo cu tabata mal contento debi na detencion di un artista di tattoo na Guarda nos Costa (GNC). A detene debi na su status ilegal. E grupo aki tabata protesta cu borchi, etc., p’asina pone e persona aki den libertad.
Richard Kramers, kende ta na cabes di GNC, a splica cu e detencion di e persona, mescos cu di hopi otro cu tin un status di ilegal, ta mesun cos. E tin su proceso y tambe kende ta tuma e decision final na momento cu haya un persona indocumenta na Aruba.
Kramers ta splica cu ora un persona no tin su papelnan na ordo, su status na Aruba no ta conforme e leynan cu tin. Ta detene un persona asina y dentro di 72 ora ta present’e dilanti hues comisario.
Hues comisario ta prepara e documentonan cu ta manda pa Corte y a base di e informacionnan manda, e ta duna un instruccion si e detencion ta legal pa e persona keda den detencion te ora cu deporte. Esey ta e sistema prescribi den ley y cu ta mantene. Si un persona ta keda cera na Guarda nos Costa pendiente deportacion, ta sosode riba ordo di hues comisario.
Tambe tin un sistema cu personanan cu pidi asilo, cu drenta clandestinamente of cu tin un aspecto di Orden Publico, e ora ey tin un otro situacion caminda cu ta wanta e persona aki, basa riba ley y DIMAS tin 28 dia pa atende e proceso y duna e persona cu a pidi asilo, un contesta riba su peticion.
Si e contesta aki ta negativo, e ora ey ta duna e persona un instruccion, presenta pa hues comisario. Esey ta e sistema cu tin y cu ta mantene actualmente. Den e caso aki e artista di tattoo, sin status legal a bay Corte y hues comisario a dicidi cu su detencion ta legal y mester keda cera.
