Sigur pa mas di un decada caba, Anselmo Pontilius ta fungi como Landsbemiddelaar (Mediador di Gobierno). Pero ultimo temponan el a expresa su deseo di bay cu pension.
Ta menciona varios nomber como candidato pa bira Landsbemiddelaar (mediador di Gobierno). Riba esaki Minister di Labor, Glenbert Croes a indica cu e proceso ta den man di Departamento di Recurso Humano (DRH), cu a propone un comision y Gobierno a aproba e comision aki.
El a sigui bisa cu e no tin idea di ken tur (lo) a aplica. Pa e persona bin na remarca pa e posicion, e lo mester pasa e scrutiño di e comision. Loke e mandatario ta spera, cu mirando e trayecto di e mediadornan cu nos pais tabatin, manera Julio Quijada d.f.m., Jerry Rasmijn y por ultimo, esun actual Anselmo Pontilius.
E minister a bisa cu e tin un gran respet pa Anselmo Pontilius, p’e gran trabou cu ta desplega. Su suplentenan actualmente ta den e comision di evaluacion cu lo mester nombra un mediador cu tin un gran respet pa ambos partido, tanto pa e dunado di trabou como e trahado. Esey ta fundamental.
