Diamars atardi un señora a cuminsa grita pa auxilio ora cu el a ripara cu e tabata pega den e saliña dilanti Marriott Resort. El a bay purba haci un “short cut” pero no a conta cu dado momento e tera ta bira lodo y ta cuminsa sak bay abou.
Bomberonan, cu separa di combati candela tambe tin como tarea pa rescata hende y bestia, a yega e saliña y a topa cu un señora cu un accent Spaño, masha spanta y perdi. El a conta e bomberonan cu e ta biba banda di Yen Yen Bar & Restaurant y cu el a purba corta e ruta pa e yega riba e caminda grandi pa coy bus pa bay Playa.
Despues di un bon rato, cu e señora a calma di e susto ricibi, e bomberonan a subie den e truck di Brandweer y a dun’e un lift pa cas. E señora a keda asina impresiona di ta den un truck bomberil, cu a logra balansa su susto di tabata pega memey den un saliña.
