Dialuna a tuma luga e di dos reunion oficial di e parlamento nobo. A pidi parlamentarionan pa nan sentimento riba inversionnan cuantioso cu minister di husticia demisionario kier haci. E inversion ta incera pa compra di ‘bulletproof vest’ y tambe pa un lichting nobo pa e aspiranten-opleiding pa KIA y Cuerpo Policial.
“Como miembro di parlamento y vice-voorzitter di fraccion di AVP, mi ta comparti cu comunidad mi preocupacion pa cu e situacion penoso cu nos pais Aruba ta pasando aden, unda cu desde januari ultimo nos ta wordo asota pa casonan di tiroteo y asesinato, principalmente bou di un grupo di hoben di menos di 25 aña di edad. Den e situacion cu nos ta, e necesidad pa material y personal den nos aparato hudicial ta keda indispensabel, pero mesun indispensabel ta e cumplimento di nos mandatarionan na leynan y e responsabilidad pa tin un presupuesto aproba pa nos pais por sigi opera.”
Aruba tin lunas sin un presupuesto y e incumplimento aki no por traduci den un derecho di custumber, manera a bisa e minister den sala di parlamento dialuna mainta. Mandatarionan ta busca a base di sentimentonan di parlamento un aprobacion pa gasta mas placa sin sa cu Aruba tin e.
Minister encarga cu husticia no por a garantisa miembronan di parlamento cu e gastonan pa e vestnan aki lo keda den e margen di locual lo tin disponibel pa cu e ministerio di husticia den e presupuesto nobo y tampoco por a comparti unda otro den e presupuesto lo corta pa por cubri e gastonan extra aki. Tampoco tabatin e “gunningsadvies” di e compra aki disponibel pa miembronan di Parlamento por a wak.
Mester considera hopi lamentabel e hecho cu trintinuebe persona a wordo prometi pa cuminsa cu e aspiranten-opleiding nobo pa KIA y KPA y a hasta pasa den e procedura di seleccion necesario caba pero nan no a wordo informa cu e financiamento pa esaki no ta disponibel pa motibo di entre otro incumplimento pa cu pais Aruba su leynan di presupuesto.
Ultimamente Gerlien Croes di AVP a comparti varios biaha su preocupacion cu awendia a bira custumber cu ta tuma decisionnan desviando di nos ley- y responsabilidadnan, e hecho aki ta inaceptabel.
Nan ta spera cu a corto plazo e ministernan entrante hunto c’un presupuesto aproba lo por haci cu decisionnan responsabel cu ta wordo tuma den liña cu locual nos leynan ta prescribi y necesidadnan ta permiti,” Parlamentario di fraccion di AVP, mr. Gerlien Croes a declara.
