Den parlamento di Aruba ta tumando luga reunion importante riba ley di LNT, caminda cu tin cu bay tuma decision riba ahuste salarial di topambtenaar di pais. A haya oportunidad di un entrevista cu parlamentario di partido AVP, Gerlien Croes riba kico tur ta tumando luga den sala di parlamento.
Gerlien Croes a duna di conoce cu Minister President a bay Hulanda, negosha cu nan y a yega na palabracion cu ta entrega of miho bisa e ambternarnan ta entrega 12.6 % y awo kier duna bek 5% pero pa logra esaki tur compania estatal tin cu entrega. E ta hunga cu pan di pueblo! Na prome instante a hunga cu pan di ambtenaar y awo ta hunga cu pan di e grupo di topambtenaar. Un wega di kita y pone for di un grupo pa otro. Esaki no por!
Parlamentario Croes ta enfatisa cu na momento cu e ley aki pasa, si acaso e pasa manera ta mustra cu lo tuma luga, e lo bay tin un trickle down effect. No ta solamente e director ta bay atras sino tambe a manager, e supervisor, esun den administratie, e cahera y asina por sigui menciona. Akinan ta tur hende ta bay atras., Ta papia di un grupo sumamente grandi. Gerlien a remarca cu no ta solamente di Setar, WEB of Elmar ta papia di dje pero mas bien di un grupo di nobenta entidad, incuyendo tur e fundacion, centronan di bario y fundacion di scol.
Algun no ta yega e suma salarial menciona pero ta bay keda afecta asina mes debi na e ley di LNT. Un ley cu no tabatin e base, e onderzoek pa demostra na unda y cua compania lo keda afecta y na ki forma. Algun di nan cu ta paga dividendo y otro completamente subsidia door di gobierno pero ningun momento a trece dilanti unda ta diferencia cada un for di otro, ni tampoco kico ta e salario berdadero di cada compania.
Di otro banda Gerlien Croes ta menciona tambe cu e 130% cu gobienro a propone como e cambio no ta bon calcula. Esaki menciona den rapport di Raad van Advies, como tambe un Actuaris cu a haci onderzoek y a indica cu e parti di calculacion di pension di unda a stipula e norm bedrag no ta cuadra. E no ta corecto. Gobierno di su banda no tabata interesa, a manda asina mes e ley aden y sperando pa esaki pasa. Den sala di parlamento ta sinti cu un gran mayoria lo vota pro un ley asina, sin tene cuenta cu e efecto.
E esencia di tin un normering top inkomen, un ley cu ta regula esaki por, pero e ta depende con ta haci esaki. Kico ta e base, e estudio, datos cu ta algo cu nan no a presenta na parlamento. Locual cu ta mas preocupante y ta algo cu a menciona na mas di un ocasion, e profesionalnan cu ta desea di bin traha bek na nan pais no lo haci esaki mas. E ta dificil caba pa haya hoben profesional pa eherce den politica awo ta hacie mas dificil den compania caminda cu e no ta atractivo pa nan bin traha despues di profesionalisa nan mes, bon studia.
Nan lo prefera di bay otro pais caminda nan lo ta miho paga. Sin lubida cu na final ta e gobierno mes lo tin cu carga cu subsidio y cu e perdida di profesional na momento cu e companianan aki bay atras.
