Un hotel di 900 kamber den caso normal ta bay crea direct y indirect 6 X 900 = 5400 cupo di trabouw y e hendenan ta bay trece nan famia X 3 sea ta bay atrae un total di 16.200 hende stranhero.
Di e 5400 cupo di trabouw cu ta wordo crea 95% of 5130 ta bay gana un salario minimo nan NO ta bay paga loonbelasting.
Cu e decision aki nos grupo di salario minimo ta bay surpasa e 70% di nos total trahador na Aruba.
Den Economia e proyecto aki ta contribui na un crecemento economico y NO na un DESAROYO di nos Economia, manera ta wordo bisa. Cu otro palabra e ta bay contribui na mas desaster social.
Cuallkier hotel di mas cu 50 kamber cu habri su portanan na e momento aki, no importa na ki parti di Aruba, ta bay haci mas daño cu bon na “Aruba”.
Un hotel nobo ta traduci su mes den entre otro e siguiente cenarionan:
- Ta haya 10 aña liber di belasting,
- no ta inverti ni un cen preto den traha cas pa su trahadornan
- no ta inverti den e integracion di nan trahadornan cu nan a importa for di exterior.
- E trahadornan aki ta gana salario minimo, no ta aporta na belasting y un suma minimal na fondonan di AZV y SVB.
- Nan ta adkeri derechonan substancial pa nan y nan famia ya cu e fondonan aki ta traha a base di e prinicipio di solidaridad.
- Realidad ta cu no ta e Hotel pero Gobierno sea pueblo di Aruba tin cu carga cu e gastonan social di e “capital humano” di e hotel.
- Gobierno (Pueblo) ta core cu e gastonan extra di seguro medico AZV, SVB, skol practimanente por nada, mas vivienda social, expansion di e planta di awa y corriente, servicionan di gobierno, ayudo social, mas trafico riba caminda, mas caminda, mas mucha mas schol, mas cama na hosptial, mas preshon riba fondonan di AZV y SVB, mas problema social, mas criminalidad.
- Tur e ganashi di e hotel ta keda den exterior. E Gerencia cu tin salario barbaro ta cobra mayoria di nan salario pafor di Aruba pa no paga Belasting.
- E empleadonan stranhero cu salario minimo tambe ta manda un parti di nan placa afor y biba den un forma miserabel,
- Ambos mayoor tin cu traha sea mas menor na cas sin atencion, mas hoben riba caya cu no ta bay schol, mas problema cu droga, hortamento y atraco ta bin na moda, mas sufrimento den pueblo.
- NO lubida cu un di e aspectonan negativo di Turismo ta cu di 10 cupo di trabouw cu e crea 8 ta salario minimo.
Lo ta bon pa Gobierno cambia su maneho y condiciona e permiso di trabao di tal manera cu e comerciante(hotelero) of individuo cu ta importa empleado pa traha, mester paga, un seguro medico apart pa cada trahador nobo cu nan kier trece awor pa un periodo minimo di 3 aña, mester percura pa un cas of un lugar decente pa nan y aporta na gastonan di educacion di nan yiunan y aporta na e comunidad cu obranan social for di un parti di nan ganashi.
Recomendacion na nos Gobiernonan, pa di imediato introduci un moratorium riba camber di hotel/hospedahe/Condominio, consolida nos posicion actual y mehora nos producto Turistico y Paraturistico nos por haya un miho prijs pa nos producto riba mercado cu e consecuencia pa un mihor salario y orario di trabou di 40 ora pa siman pa e trahador nan den hospitalidad y como consecuencia mihor beneficio social den nos comunidad.
A bira tempo pa nos Parlamento traha riba un ley cu ta exigi cu cada proyecto Commercial (Hotel,Condominio) nobo mester presenta un estudio di “Evaluacion Social” di nan proyecto cu tin cu wordo publica 3 biaha den diferente corant y media, esaki tin cu reemplaza e asina yama “estudio di Factibilidad” cu por cierto semper ta positivo ya cu e ta exclui e aspecto di e costo di infrastructura y costo social. E evaluacion social mester mustra e beneficio social contra e costo social di cada proyecto.
