Bloke sindical di Corsou a tene un conferencia di prensa diasabra atardi, den cuadro cu e hecho cu Corsou lo a bira un hub humanitario pa Venezuela.
Gherrel Remilia di sindicato APRI, cu tambe ta forma parti di e bloke sindical, a entrega un carta diabierna na Prome Minister Rhuggenaath, bisando cu nan no ta di acuerdo cu ta uzando Corsou como hub, pa diferente motibo.
E motibonan ta negativo, di cual un di nan principalmente ta e refineria. Den e caso aki, por compronde si Venezuela dicidi pa cera frontera y tambe e parti maritimo, como refineria, Isla a coy awa pasobra no lo ricibi crudo.
E sindicatonan a traha hopi duro den e dianan aki pa haya crudo pa por start e refineria bek. Tur esaki ta implica cu e decision cu Gobierno a tuma ultimo aki, lo bay stroba cu tur e procesonan cu ta trahando riba dje.
Crudo
Segun Remilia, e crudo cu tabatin, a procesa nan. Awor aki no tin nada mas. A papia cu gobierno di Venezuela, sigur pa dos siman tras di otro, con ta bay haci yega bek na crudo, pa motibo cu tabatin beslag riba barconan di Venezuela na Corsou. Por bisa cu practicamente ta yegando na un posibel solucion pa logra trece crudo bek.
Mirando e hecho cu Gobierno a ricibi e peticion pa por uza Corsou como hub, a papia cu Prome Minister pa evita esey tuma luga. Si dado caso cu bira un guera, pa Corsou e lo bira hopi malo.
Hub
Tin di compronde cu di parti di Gobierno Venezolano, cu no lo acepta cu Corsou bira un hub. Nan ta considerando cu ta ayudo di parti di Merca, caminda cu nan ta bisa hasta cu por ta Merca mes a hincanan den e situacion cu nan ta awor aki y awo Merca kier bin hunga bon Samaritano. Nan a bisa cu nan lo acepta esey. Si ta yuda trece cuminda, loke sea pa Venezuela, e mester tin un forma cu nan ta confia. Na e momento aki e ayudo di Merca ey, nan no ta confia. Esey a bin ta alerta gobierno riba dje, pa wak e cos aki hopi di cerca. Awor aki ta un zona di Paz na Corsou y kier pa Corsou keda un zona di paz.
Siguiente paso
Durante e reunion di diasabra a dicidi cu tur sindicato di Corsou lo bin hunto pa fiha un posicion. E carta cu a entrega diabierna, ta bisa cu pa dialuna lo duna un contesta. E sindicatonan a bisa cu nan lo warda te cu 11’or di mainta, cu of sin e carta lo fiha un posicion riba e parti di hub aki.
