George Jamaloodin culpabel di ordena asesinato di Wiels

George Jamaloodin, ex Minister di Finanza, diabierna den oranan di atardi a scucha Corte impone un castigo di 28 aña p’e ya cu el a wordo haya culpabel di entre otro a duna ordo via di un otro persona pa mata e politico Helmin Wiels.

Jamaloodin tabatin acusacion contra dje di cual e prome ta e caso Passaat, cu ta falsificacion di un documento, poniendo un fecha hopi mas tempran di loke en realidad e mester tabata. Den e caso geranium, el a wordo acusa  di como minister malversa un suma di 450 mil florin, cual tabata placa di subsidio di FOBS Divi Divi;; a haci uzo di factura, oferta y “aanmaning”  falso riba nomber di un compania.

Banda di e acusacionnan ey, tambe el a wordo cita pa: complice den asesinato di Helmin Wiels dia 5 di mei, 2013 na Corsou. Subsidiariamente, ordena of paga pa mata Wiels, den e periodo di 2 di juni 2012 pa 5 di mei, 2013 na Corsou.

Pa e prome acusacion a declar’e liber debi na duda den e pruebanan presenta door di Ministerio Publico di kico tras di e decision pa “anti-dateer” algun documento.

Pero di e otronan si e no a logra scapa. Den e caso di malversion e mes a admiti, pero e no ta corda con tur cos a bay, pues e detayenan.

Den e caso Maximus, Jamaloodin a wordo acusa cu hunto cu otronan, a duna e homber di inicial F ordo pa asesinato di Wiels. Pa esaki F a pidi y a haya placa. E dos hombernan F y P ta esnan cu a contrata K y RM pa ehecuta e asesinato. K tabata esun cu a los e tiro fatal riba Wiels y a mata dos otro hende mas pa cual el a haya castigo di bida largo. RM tabata sospechoso pero a wordo mata na mei, 2013. A haya su curpa sin cabes, brasa y pianan. P tambe tabata sospechoso pero a hay’e colga den su cel, mientras F a haya castigo di 26 aña y a apela esaki.

Den e atake riba Wiels, el a haya 9 pa 10 bala cu resultadonan fatal mesora.

Despues di analisa henter e caso, Corte a yega na e conclusion cu no tin motibo pa duda den e declaracionnan cu ta condena Jamaloodin. Principalmente di e testigo anonimo, yama testigo B5. Berdad algun parti e ta saca su conclusion, pero den e partinan mas importante, ta cosnan cu e mes a experencia of cu el a mira of scucha. P’esey su declaracion a wordo acepta.

Pa tur e delitonan proba, Corte a conclui cu un castigo di 28 aña, mas un compensacion di daño di 4815 florin, ta na su luga.

Mester bisa cu e ex pareha di Jamaloodin, ta biba na Aruba y ta un consehero di Gobierno di Aruba.