Mas cu 85 profesional di salud a participa na e tayer “Ehercicio ta Medicina”

Diabierna mainta, Movemento ta Bida a tene varios tayer, tanto na Ingles como na Spaño. E curso aki ta dirigi pa profesionalnan di salud cu ta traha cu pashent. Tabata tin e POHnan, e dokter, specialistanan, dietistanan, fisioterapistanan y instructornan di actividad fisico, pa mustranan e concepto di ehercicio como remedi, y pa uza esaki mas.

Diabierna, segun Rudney Leysner, di Movemento ta Bida, a papia hopi riba e parti di investigacion cu uzando actividad fisico, bo por preveni diferente malesa cronico, manera malesanan cardiovascular y cancer. P’esey dos orador sumamente capacita, uno for di Chile y e otro for di Colombia a wordo invita pa duna informacion riba e tema aki. Un di nan ta director regional di Exercise Medicine di Latino America. E otro ta dirigi e clinica di Santa Fe di Exercise is Medicine. Ta dos orador sumamente renombra pa duna nos profesionalnan di salud mas conocemento pa uza e concepto e ehercito como remedi.

Un concepto conoci

 

Segun Leysner, e ta bin for di American College of Sport Medicine. 42 pais ta uz’e actualmente. Nan kier pa e profesionalnan sa mas di dje. Por implemente directamente pa e pashentnan. Por ehempel bay move 30 minuut, of bay haci mas ehercicio.

Pakico ehercicio ta importante

Pakico e ta importante pa e beneficionan. Aki ta haya sa conocemento y tur ta a base di investigacion durante e ultimo 20 añanan, cu ta mustra cu haciendo actividad fisico diariamente, combina cu bon alimentacion, ta reduci cierto malesanan.

Leysner a menciona cu e oradornan a papia hopi riba e parti di e beneficionan di actividad fisico, e investigacionnan. Por ehempel durante 20 aña diferente a wordo getest. A haci diferente comparacion, di hendenan cu ta activo y hendenan cu no ta activo. Por mira cu hendenan cu no ta activo, e mortalidad ta hopi mas rapido, compara cu hendenan cu ta activo. A splica cientificamente di e beneficionan di actividad fisico.

E tayer ta consisti di un parti teoretico y un parti practico, caminda cu e personanan ta siña conoce con e testnan ta wordo haci. Tambe nan ta haya sa e resultadonan. Cu esey nan ta haya datonan di nan mes, cu ta yuda nan pa tin pushups y situps.

A papia tambe di forsa di masa muscular. Esaki ta un problema masha grandi. Door di haci ehercicio, bo ta keda mantene bo masa muscular, siendo cu si bo no haci’e, bo ta bay wak cu bo ta mantene bastante tempo.

Satisfecho

Como fundacion, nan ta contento di por a ricibi casi 85 profesional di salud. Tur a bin pa scucha e diferente conceptonan cu ta papia di dje.  Leysner ta gusta puntra, evalua con ta haya e curso, etc. Tur ta bisa cu ta un bon paso. Esaki ta un kickoff, pa asina bin cu mas curso. Ta un curso basico esaki tabata. Despues por bin cu mas nivel avansa, pa asina aki e profesionalnan di salud por haya hopi mas conocemento riba e materia aki.

Un evento exitoso

Minister Dangui Oduber tabata contento di a asisti e tayer “Ehercisio ta Medicina”, caminda cu dos dokter renombra a participa den e tayer aki, brindando informacion di e importancia di participa activamente na actividadnan fisico.

E dokternan aki a cuminsa cu un programa mundial den 42 pais na mundo. Ehercicio ta e miho medicina, pa asina preveni asina malesanan cronico, manera presion, malesanan cardio vascular y diabetes.

Aruba no ta un di e paisnan mas saludabel. Ta p’esey ta importante pa enfoca riba prevencion di salud. Pa prome biaha den historia, ta percura pa AZV aloca fondonan pa prevencion pa asina inverti den esaki pa asina brinda informacion necesario con importante e ta pa come saludabel, pa evita consumo halto di sucu. Pa evita consumo halto di salo. Pa tur dia haci ehercicio pa minimo 30 minuut.

Tur esakinan ta topiconan cu ta atende den e tayer. Pa Ministerio di Salud, esaki ta parti di nan maneho, parti di nan vision. A prepara un plan nacional di prevencion, hunto cu DVG y tur stakeholdernan di Aruba, hunto cu Panamerican Health Organisation, e plan nacional di salud ta cuminsa ta ehecuta na 2020 y sigur tin bon cooperacion cu e dos dokternan.

Tin bon cooperacion tambe cu Fundacion movemento ta Bida, cu ta esun cu a organisa e tayer aki. A sponsor e evento aki. Gobierno ta hopi contento cu iniciativanan asina. A yega momento pa tur ta consciente y percura pa nos mesun salud di haci ehercicio, come saludabel y percura pa e fondo di AZV ta sostenibel na e momentonan aki.

Si no bay inverti den prevencion di salud, e fondo no lo keda sostenibel.