Entrante Diaranson, 10 di april lo tin cambio den prijs di productonan petrolero. Esaki ta un anuncio oficial cu a bini for di Departamento concerni di gobierno.
E informe ta bisa cu Minister di Asuntonan Economico, Comunicacion y Desaroyo Sostenibel ta anuncia e prijsnan nobo di benta di combustibel entrante 10 april 2024:
Gasoline unleaded-premium : 266,9 cen p/ltr. (+ 11,3 cen)
Diesel LS : 230,1 cen p/ltr. ( – 6,3 cen)
Kerosin : 210,9 cen p/ltr. ( – 4,9 cen)
E prijsnan ta inclui BBO/BAZV/BAVP.
E anuncio aki ta nifica cu pa di tres bes e aña’ki e prijs di gasolin ta subi. Solamente na inicio di januari tabatin un reduccion. Desde dia 10 di januari, 2024, e prijs tabata: Gasoline unleaded-premium : 232,9 cen p/ltr. (- 4,8 cen). SI haci un comparacion, por bisa cu e gasolin entrante diaranson ta 34 cen mas caro di loke e tabata na inicio di aña. Diesel ta casi 17 cen mas caro cu na januari y kerosin ta 12 cen mas caro. Y asina mes cu nan a baha di prijs compara cu e luna anterior.
Gran parti di e prijs di Gasolin cu Diesel ta destina pa gobierno na accijns. E accijns riba prijs di Gasolin cu Diesel ta hopi halto. Gobierno ta come un gran parti y e ganashi mes di e pompnan ta poco.
Ademas di accijns, gobierno ta come dos schakel riba e prijs di gasolin. E BBO di 7% di FMSA pa e tanki di Citgo su pomp y djey otro 7% di e pomp pa tanki di bo vehiculo. Apart di Accijns halto gobierno ta gana otro 14% riba e prijs di benta.
Finalmente di e prijs total di loke pomp ta bende, un porcentahe halto ta straight pa caha di gobierno. Pueblo por spaar un tiki door di tank te cu diamars anochi prome cu 12or di marduga.
