Garage Centraal ta introduciendo un modelo nobo y moderno di Hyundai Atos, cu ta bay reemplasa Hyundai EON. Ambos ta vehiculonan compacto y net bon pa profesionalnan hoben.
Rodney Kock, encarga cu Mercadeo, a haci e anuncio aki oficialmente di e auto cu ta categoria sub compacto y hatchback.
Den pasado a keda expresa door di clientenan di Garage Centraal cu e preferencia ta bay pa sistema automatico, pa cual a dicidi di trece Aruba e ATOS cu un “smart automatic transmission” cu ta brinda e comodidad riba camindanan di Aruba.
Ademas, e ta un auto super economico. Ta papia aki di un motor di 1.1 liter di 4 cylinder cu ta uno super eficiente. E sistema di transmision ta traha di tal forma cu e ta duna lo maximo na eficiencia di e vehiculo aki.
E ta un auto economico den tur sentido, esta no solamente su consumo di combustibel, pero tambe e aspecto di mantencion y piesanan ta hopi na alcance di e clientenan. Si un persona ta cumprando su prome auto of ta busca un auto eficiente, e ATOS ta un excelente opcion, segun Rodney Kock.
E preocupacion pa maneha un auto chikito, a wordo kita mesora door di Rodney Kock. El a splica cu Hyundai ta conoci pa su aspectonan di siguridad. No solamente nan tin experticio pa loke ta metal, pero tambe nan ta e unico compania na mundo cu tin su mesun fabrica di hero. E “cage” den cual ta hinca e auto ta extremadamente solido y “safe”. “Bo por ta sigur cu aunke cu bo ta coriendo den un auto sub compacto, bo lo ta completamente protegi y na mesun momento comodo.”
E auto ta bini cu un sistema di radio stereo cu sistema bluetooth, pa e celular tambe, e asientonan ta comodo y e diseño riba su mes ta agradabel. E espacio interior pa e categoria di dje toch ta amplio. E auto aki ta den show caba na Garage Centraal, Sabana Blanco.
