Polis patruyando den vecindario di Balashi a haye den un persecucion, cu a termina despues cu detencion den area di Mahuma. Banda di Parkietenbos na altura di Arugas e patruya a tuma nota di un vehiculo biniendo den direccion contrario cu no tabatin luz parti dilanti di su vehiculo. E patruya a dicidi di bira y bay su tras pa control’e. Na momento cu el a cuminsa core su tras a ripara cu e vehiculo no tin luz tampoco na e parti patras.
Na e splitsing bandi dump e patruya a duna e vehiculo indicacion/ordo pa para pero pa nan sorpresa e auto marca Nissan modelo March color shinishi no a sigui ordo y a dicidi di hisa su velocidad y core bay direccion Cas Paloma.
Na Mahuma a vehiculo a stop dilanti porta di un garashi na un cas cu no ta pertenece ni na e chauffeur ni na e pasahero. Aki e chauffeur a sali na careda bandonando e auto y a bula drenta cura di e cas. Den auto tabatin e pasahero cu a keda sinta na momento cu Polis a yega. E famia doño di cas a hiba un susto y mas ainda mirando cu tin hende a bula drenta su cura di cas.
Na momento cu a habri porta di e banda di e chauffeur por a haya holo fuerte di marijuana, tambe a constata presencia di un grinder den e compartimento memey. A acerca e pasahero cu a indica cu e auto ta di su colega di trabou y cu e tabata hiband’e cas.
A tuma e auto den beslag y a transport’e cu takelwagen. Prome cu a transporta e auto a revis’e y a haya varios articulo. A haya 2 caha blanco den e dashboard cu varios telefon celular, tanto di marca Samsung como iPhone como tambe accesorionan adicional. Riba e sienta patras tabatin un rugtas cu varios celular aden.
Locual a compronde na e sitio ta cu a detene e chauffeur y a hib’e Warda di Polis na Sta Cruz pa mas investigacion y interogacion.
