Fundacion Venex di Corsou a ricibi un invitacion di Asamblea Nacional di Venezuela y a ricibi autorisacion di gobierno Hulandes pa bira un di e organisadonan di ayudo humanitario.
Lo tin 3 punto p’e Ayudo Humanitario pa Venezuela y den Caribe lo tin uno cu ta na Corsou. E fundacion VeneAruba Solidaria a ricibi un carta di Venex pa ta parti di esaki, kendenan a acepta esaki pa motibo cu nan kier yuda Venezuela. E fundacion ta invita pueblo di Aruba henter cu kier yuda pa ta parti di e evento humanitario aki, pa despues manda tur donacion Corsou.
Fundacion VeneAruba Solidaria lo ta organisando e evento dia 23 di februari proximo y lo ta uno priva, unda cu no lo tene esaki na niun luga publico. A crea un chat pa boluntarionan, unda ta mira kendenan kier participa den e evento aki “Ayuda Humanitaria Urgente”. Tur cu kier yuda lo pone nan den e chat aki, unda cu lo crea comisionnan pa asina mira unda tur por yuda segun e lineacion di Asamblea Nacional y Venex di Corsou a manda. E islanan A-B-C ta trahando hunto pa yuda den e evento aki.
Lo tin luganan specifico unda lo pone un caha identifica y tur hende por pasa laga nan consumo. E luganan cu lo tin e cahanan aki ta Beach Teniss Aruba, Paseo Herencia, Isla Pop, Twenty 2 Gelato and Cofee, Bontires, Caribbean Print Center, Caliente 90.7 FM y Coco Plum Restaurant. Loke hendenan por trece ta hariña, aros, spaghetti, azeta, sucu, supercereal, alimento terapeutico cla pa consuma (paki), mescla di micronutriente (paki), formula pa babynan te cu 12 luna.
Tambe por yuda cu remedinan pa muchanan y hendenan grandi. Nan a ricibi for di Venex lista di remedinan cu nan tin mester pa manda Venezuela. E lista ta bin di tur hospital di Venezuela, unda cu a pone ki tipo di remedi mester y pa cua tipo di pashentnan. E fundacionnan cu kier yuda cu esaki, lo ricibi e lista di remedi y lo ta pasando na companianan, boticanan pidiendo colaboracion. E meta di e fundacion ta pa yuda muchanan y hendenan grandi di Venezuela pa asina no tin un pais cu hendenan desnutri den futuro.
Pa mas informacion por manda email na [email protected]. Tambe por tuma contacto na e celularnan 5633313 of 5937694.
