Na final di october Stichting Rancho lo bay tin diferente actividad. Fuera di esey lo tin un brain storming session pa tur boluntario. Ta pa e motibo aki mes ta invita tur persona cu ta desea di bira boluntario of a yega di haci trabao boluntario na Sticting Rancho, pa bin dia 26 di october, pa 6:00 pm te cu 8:00 pm na e localidad nobo di e fundacion den Visstraat, pa asina haya sa di e parti di e boluntarionan y tambe di e fundacion mes pa haya sa kico nan lo sigui haci den futuro.
Tin un otro brainstorm session cu lo tuma luga dia 29 di october. Segun Jennely Quandt, coordinado di centro di actividad Rancho, esaki ta specialmente pa tur esunnan cu ta biba den e bario y vecindario di Oranjestad pa asina haya e informacion di e comunidad kico nan ta desea di mira pa loke ta actividad cultural, educativo den e area di Oranjestad/Rancho.
Ta sumamente importante pa tin e informacion aki di comunidad, pa asina sigui desaroya programa cultural, educativo den futuro.
Un actividad cu semper nan ta organisa tur ultimo diahuebs di luna, ta e Marshe Rancho, cu ta un mercado local. Cu esaki ta invita na henter comunidad completo pa bin aporta na esaki. Tambe ta haci yamada na tur hende cu ta desea di bende producto local (traha na Aruba preferiblemente), pa tuma contacto cu Fundacion Rancho, ya cu ainda tin luga disponibel.
Marshe Rancho lo tuma luga dia 28 di october, di 4:00 pm pa 8:00 pm.
Clifford Rosa, presidente di e fundacion a indica di ta contento cu e desaroyonan aki, gradiciendo tambe tur hende cu a haci nan donacion, manera Fundacion Samenwerkendefondsen y Cede Aruba, cu e fondonan disponibel pa por crea y sigui sostene e proyecto aki di e centro di actividad Rancho, un proyecto cu ta den su desaroyo. E desaroyo aki ta loke cu ta bay ta planificando un tiki mas den e parti di capacitacion y p’esey e brainstorming sessions ta asina importante. Diferente di e procesonan cu ta pasa door di nan ta esencial pa asina comunidad hunto, por traha riba e proyectonan pa futuro.
Distefano Wernet, miembro di directiva di Fundacion Rancho a comenta di su parti cu Fundacion Rancho mester di boluntario y ta sumamente importante pa tin nan pa por realisa e metanan di e fundacion. Inscribi y tuma contacto.
Fundacion Rancho kier traha un comunidad rond di nos herencia cu ta hopi grandi y valioso mes den Playa y Rancho. Comunidad ta bay hunto cu comunicacion. P’esey tin e brainstorm session pa por haya informacion pa por intercambia esaki pa hunto cana e caminda pa eleva, proteha y cuida nos cultura.
Cultura nos ta traha hende, ta hende ta traha cultura. Ta un dicho famoso di un autor di Nigeria.
Wernet ta spera y ta conta riba presencia di comunidad den e diferente eventonan cu lo tuma luga den e resto di luna di october.
Tin hopi trabao pa haci y cu bo aporte como ciudadano, por tene e cultura di Rancho na halto.
Pa cobertura mas amplio lesa edicion di TREMPAN mañan.
