Diadomingo ultimo a tuma luga celebracion di e prome lustro di Fundacion pa Esnan cu Deficiencia Auditivo Aruba (FEDAA). Esaki a tuma luga na MFA na Paradera den presencia di entre otro Gobernador di Aruba, Alfonso Boekhoudt, Minister di Enseñansa, Ciencia y Desaroyo Sostenibel, Dr. Rudy Lampe y miembronan di e fundacion y demas invitadonan.
Stella Montsanto, un di e fundadonan y actual Presidente di e Fundacion, a yama bon bini na esnan presente y a duna un relato di e fundacion di e Stichting aki, cual danki na e cooperacion financiero di Rotary Club Rijswijk-Ypenburg di Hulanda, a mira luz di dia, riba dia 11 di April 2013.
Miembronan di directiva di FEDAA ta como lo siguiente. Fuera di e Presidente Stella Montsanto, tin tambe:
Cherly Arends – Secretaria
Jean-Luc Croes – Tesorero
Gladys Kock – Miembro di directiva
Vanessa Guiterez – Miembro di directiva
Tambe tin Stayce Franca cu ta un bolunario activo den e fundacion.
Tur ta traha boluntariamente cu hopi dedicacion y pasion pa e fundacion FEDAA.
Montsanto ta continua: “Rotary Hulanda a mira e importancia pa yudami financieramente pa funda e fundacion pa yuda e personan cu problema di oido aki na Aruba cu hopi nesecario. Pa esaki mi ta sumanete agradeci na Rotary Club Rijswijk-Ypenburg di Hulanda.
Ariba e dia sepcial aki 11 di April 2013 e board di FEDAA, algun persona cu problema di oido y e miembronan di Rotary Hulanda a wordo ricibi pa Notaris Teakema na su bufete. Notaris Teakema a ricibi nos brasa habri y tambe a pone su granito pa asina awe FEDAA por ta exsisti y hunto awe nos por celebra nos Prome Lustro.
Deficiencia Auditivo (sordura) no ta asina visibel pa mayoria di hende, comunidad no ta tene cuenta cu e personanan aki. Pues e grupo aki ta enfrenta hopi obstaculo cu ta stroba nan desaroyo y participacion optimalmente den nos comunidad. Pa e persona cu deficiencia auditivo e “drempel” pa forma parti di comunidad ta hopi halto y den diferente situacion tin biaha nan ta wordo descrimina.
Riba diferente tereno e fundacion ta brinda ayudo. F.E.D.A.A. ta fungi como
“E BRUG” cu ta haci tur su esfuerso pa facilita:
– Participacion,
– Aceptacion y integracion pa e personanan cu deficiencia
auditivo den nos comunidad.
Fundacion FEDAA tin como meta pa entre otro defende derechonan di personanan cu deficiencia di oido,
– Wak nan necesidadnan,
– Educacion,
– Duna gia,
– Conseho,
– Formacion,
– Señala y traha riba e problemanan relaciona cu perdida di oido.
– Problema di comunicacion,
– Descriminacion,
– Problema social,
– Laboral,
– Criminalidad,
– Economico.
Tin scarsedad na informacion tanto den nos comunidad como den e comunidad di e persona cu problema di oido.
Aki FEDAA ta traha pa duna informacion necesario cu ta importante pa e persona cu perdida di oido mes, y mas importante na su famia, circulo di trabao y tambe personanan interesa.
F.E.D.A.A. ta organisa y ta traha hunto cu su miembronan ariba diferente actividad, p.e. organisa diferente workshops, anochi informativo, educativo, actividadnan social, curso, enz. E necesidad mas grandi pa e personanan cu deficiencia auditivo ta un espacio/luga unda por reuni, bin hunto. Unda nan por bay pa volg curso pa eleva nan potencialnan y posibilidadnan. Unda nan tin contacto social cu ta hopi importante pa e grupo aki, tin di nan ta biba isola.
FEDAA ta traha cu diferente instancia y fundacion esaki ta netamente pa haya e ayudo profecional avansa di e instancia pa e miembronan di FEDAA. Ora e miembro bin aki na oficina y ta aserca y confia nos cu cualkier problema, nos ta yuda te na unda nos por y si mester di ayudo mas profecional avansa nos ta shakkel in por ehempel;
Si ta encera trabao nos ta traha hunto cu e Jobcoach di Trampolin pa Trabao.
Tambe ta traha hunto cu Sociale zaken pa cu e problemanan social cu ta un di e problema mas principal cu mester wordo atendi. FEDAA ta traha tambe cu Bureau Sostene Mi y asina mi por sigi mencion, tin mas instancia y Fundacion cu ta brida FEDAA ayudo profecional.
FEDAA ta forma part tambe di e organisacion: Plataforma pa Persona cu Limitacion. (PPL) Den e organisacion aki tin diferente Fundacion cu ta traha hunto y ta uni forsa pa defende e derechonan y traha na bienestar di e persona cu diferente forma di limitacion den nos comunidad.
FEDAA tin su oficina aki na MFA-Paradera. Esaki ta un concepto ideal pa nos fundacion, nos ta sumamente agradeci cu FEDAA tin nos oficina aki den. Esaki ta un algo hopi positivo unda nos por integra e personan cu deficiencia auditivo den nos comunidad. Netamente aki nos fundacion ta comparti e vision y ta wak e parti positivo di loke MFA-Paradera ta y tin pa ofece e personanan cu deficiencia auditivo. Cu un espacio/oficina den MFA Paradera nos fundacion ta traha mas eficientemente y por optimalisa nos servico pa e personanan cu deficiencia auditivo.
Na MFA-Paradera e miembronan ta intercambia y ta hunto cu personanan den nos comunidad cu ta haci uzo di tur locual MFA Paradera tin cu ofrece. p.e. bibloteca, computer, cafetaria, sala pa reuni, duna lezing, curso enz. Aki nos ta papia di entregracion di e sordonan den e comunidad cu esnan cu si tin nan oido.
Fundacion F.E.D.A.A. ta sigur cu e projecto aki lo ta un projecto bunita y cu lo bira sigur un bunita ehempel pa comunidad henter. Sigur lo wak su frutonan di inclucion, entercambio y colaboracion entre e dos gruponan aki.
Esaki ta un proceso Hopi necesario den nos comunidad.
Cu un espacio/oficina na MFA Paradera hunto nos lo saca e personanan cu deficiencia di oido for di nan isolacion y duna nan oportunidad di desaroya y di forma parti di nos comunidad cual cu nan tin derecho ariba dje, mescos cu cada cuidadano di nos pais.
Den e añanan cu a pasa nos a siña hopi y a haya hopi experencia y a infrenta hopi reto tanto positivo y negativo.
Pero e satisfaccion mas grandi ta, di sa cu tur nos miembronan cu tin actualmente ta contento y satisfecho y orguyoso cu e logronan di nan fundacion y ta haya hopi necesario pa tin un fundacion unda nan por bin pa ayudo y intercambio.
Cada actividad cu FEDAA organisa ta bin caranan nobo y esaki ta locual nos Fundacion ta desea. Tin persona cu problema di oido cu ta biba Isola sin ningun ayudo, tin cu no tin trabao. Esaki ta e parti peligroso cu ta pone cu nan ta haya mal amigo y ta cay den e parti negativo di bida. Cu ta droga, criminalidad, ect. Mas peligroso ta isolacion, e parti doloroso aki Fundacion FEDAA a experencia.
Pero FEDAA tin e parti hopi positivo y bunita cual ta e deseo cu miembronan tin, esaki ta di tin un trabao nan kier traha, nan no kier cobra onderstand, nan ta desea di participa y aporta na nan pais. FEDAA tin miembro cu si ta firme para den nan sapato y ta briga pa nan drecho. Esaki ta e miembronan cu ta un ehempel bunita pa orto miembro den nos Fundacion.
Por ehempel; Miembro cu tin 25 aña of mas trahando, tin un cu ta manager y a ricibi diferente awards pa e trabao excelente cu e ta eherece. E miembronan aki ta yuda y stimula e otro miembronan, mustranan cu nan tambe por logra. Esaki ta e parti bunita di FEDAA.
E meta final di FEDAA ta; Pa e persona cu problema di oido alcansa un posicion igual den nos comunidad unda e identidad propio di e hende sordo/cu problema di oido ta keda manteni.
F.E.D.A.A. ta boga pa cada;
– Baby, Mucha, Hoben y Adulto cu problema di oido aki na Aruba por ricibi e miho gia posibel pa asina e por funciona optimalmente den nos comunidad. Aki ta importante e parti di educacion pa asina nan por forma un bon base pa por sigi desaroya den cualkier ramo laboral.
Un di e trabaonan mas importante di World Federation of the Deaf ta, pa defende y pa pone na prome luga y sigura e importancia di e derecho di e persona cu limitacion di oido rond henter mundo, esaki den tur e aspecto di nan bida. Nan tin derecho ariba un bon educacion, aktividadnan social, deportivo, economico, arte y musica mescos cu cada cuidadano di nos pais.
FEDAA ta desea un comunidad cu ta sali for di e punto di bista di e posibilidadnan di e persona cu problema di oido y NO enfoca solamente riba su disabilidad.
