Cu’un dolor inmenso fundacion Bernadina Growell-Kock ta tuma despedida di Juan Chabaya, Padu Lampe. Segun e fundacion nos gran y inolvidable tata di Cultura Padu merece tur merito di mundo paso Padu a nifica hopi pa musica, arte y folklore Arubano.
Sin Padu awe Aruba lo no tabatin un himno asina precioso. Padu no solamente por a toca su piano sublime sino alavez por a canta, composita y tabata pintor. E tabata un bon tata pa su yiunan y di henter Aruba. E fundacion dedica na mama di cultura, Bernadina Growell-Kock d.f.m., tin hopi di gradici Padu. Desde comienso semper e tabatey pa sostene e fundacion den su ideanan, eventonan y festivalnan.
Fundacion Bernadina y rumannan di Bernadina ta hopi agradecido pa cu esaki. Nos ta gradici alavez Padu su yiu muhe stima Vivian y su estimado esposo Victor pa nan dedicacion y pasenshi pa semper a hiba Padu unda cu el a presenta y na eventonan di fundacion.Padu y Bernadina semper tabata hunto pa representa nan titulo di tata y mama di cultura. Y despues cu Bernadina a fayece Padu a keda representa su tutulo na un forma ehemplar. Aunke tin cu tuma despedida di Padu, e fundacion ta convenci cu su memoria lo keda bibo pa semper den su famia y den nos pueblo.
Den nomber di rumannan di Bernadina, directiva di fundacion, comisarionan,voluntarionan, diferente dama y damitanan, prendanan cultural, participantenan y ganadornan di festivalnan, fundacion ta desea Vivian, Victor y demas famia hopi forza. Cu henter nos alma y curazon nos ta bisa Padu ayo y te despues. Cu Padu y sosega den Reino di Senjor.
