Sindicato FTA a participa na e reunion cu Gobierno riba e situacion economico / financiero. E sindicato no ta sinti cu a yega mucho leu cu e reunion. Nan a haya algun cifra pero ta considera cu loke tin ainda riba mesa pa Gobierno tuma decision riba dje ta hopi abou. Gobierno keto bay ta kedando cu un buraco hopi grandi.
Hubert Dirks di FTA ta mira desde awo pa December cu e situacion lo bira uno hopi percario. Sindicatonan ainda tin diferencia hopi grandi di opinion cu Gobierno. Esaki ta haci cu mester bin mas cerca otro, el a bisa. Proporcicionnan mester bin mas cla di tur banda cu e meta pa yega na un solucion.
E situacion na pais Aruba lo bay bira hopi dificil desde awo pa fin di aña, segun e sindicato. Si no tin un entendimento e lo bira hopi dificil. No por tarda, pasobra e lo bira mas pio. “Ohala, saca algo beneficioso di e reunionnan aki.” E ta supone cu dialuna por ta lo tin un otro reunion, pero ainda tin un diferencia grandi di pensamento.
Segun Dirks, tur hende mester ta consciente cu mester busca e solucion y pa yega na dje mester di creatividad y boluntad di tur hende. Ora ta papia di un situacion asina, solidaridad mester tuma luga. Esaki kiermen tur hende y sindicatonan ta para ariba cu no por ta uno si y otro no ta entrega. Tur hende ta entrega y na tur nivel.
E no ta algo facil pasobra sector publico ta un sector hopi cerca di Gobierno y hopi importante. Sin laga afo, sector priva ta esun cu ta sufriendo aworaki. Ta yega un momento cu sector publico ta bay keda cu problemanan serio, cu e ta bay bira algo cu te hasta Hulanda mester bay tuma over completamente. Segun e sindicalista esaki lo soluciona e problema aki.
Cu e ambtenaarnan entrega 12.6%, ministernan y parlamentarionan 15% di nan salario, esey no lo yuda. Sindicatonan di trahadonan publico no ta di acuerdo tampoco. Nan ta kere cu e parti di 5% mester ta mas halto pa mas hende cu no ta ambtenaar. Lo sigui discuti riba dje pasobra esaki ta hopi abou. Loke ta wordo logra cu esaki no ta suficiente. Sindicato di sector publico tin rason, pasobra no ta akinan mester mira pa corta.
Tin hopi caminda mas pa corta y e ora ta yega mas cerca unda mester yega, segun Dirks. E caminda ta hopi largo y si no yega, e ta bira un situacion cu no por haal e. E ora ey Hulanda mester haci loke mester haci y kisas no na fabor pa Aruba. Segun e sindicalista, esaki ta den sentido di autonomia di Aruba.
