Mediador di Gobierno a organisa un referendum solicita dor di sindicato FTA pa e trahadonan di Ruth Chris Restaurant na Aruba Marriott Resort & Stellaris Casino. Un total di 24 trahado por a haci uzo di nan derecho di voto, di cual 16 a presenta pa vota y tur 16 a vota pa sindicato FTA. Y den e caso aki 50% plus un tabata 13, pues nan a haya e mayoria.
Mediador di Gobierno, Anselmo Pontilius a haci un apelacion na e dunado di trabao y na e sindicato, pa nan sinta na mesa, dialoga cu respet mutuo, pa hunto negosha e contracto colectivo den un forma profesional, amical, sin tin mester di presencia di Mediador di Gobierno.
Den caso di Aruba Marriott Resort & Stellaris Casino, nan tabatin preguntanan si berdaderamente e referendum lo por a bay door. Manera sa, tabatin un posibel caso den corte, cu lo exclui e personanan cu ta riba 60 dia di prueba, pero finalmente e caso no a sigui.
E referendum a tuma luga di acuerdo cu ley y lo publica e resultado awor.
Anselmo Pontilius a sigui splica cu e ta sali for di e punto di bista, cu e trahadonan mes tin un serie di condicion di trabao cu ta faborabel, trahando cu un empresa manera Marriott, pero tin otro puntonan cu nan lo desea di incorpora. Logicamente no tin un tempo mara na dje, pero ta bon pa e partidonan mes determina un tempo realistico entre nan dos.
E sindicato tin cu entrega su proposicion. E compania por traha su contraproposicion. E trahadonan eynan sigur tin un serie di condicion di trabao existente y lo mester mira kico ta realistico den e realidad di e empresa cu nan lo por mehora.
