Ultimo tin un avalancha di delito tumando luga den Caya Betico Croes. E comerciantenan den caya na momentonan aki aparentemente no ta sinti nan mes mucho sigur mas tampoco. Frank Tieleman, comerciante den Caya ta bisa cu den su caso mes nan a horta un cantidad di caha di cerbes despues di un evento cu el a organisa recientemente.
“E plasa aki ta yen di choller. Y tur kier algo. Mi mes ta poco babuca di cuanto nobo tin, den dia bo no ta wak nan pero anochi si.”
Den centro di ciudad aworaki tin un grupo grandi di adicto ambulante canando rond causando hopi daño na comerciantenan. Si bo wak unda Baby Back Grill ta, n’e parti cu a kima, eynan tambe tin algun adicto ambulante ta biba sin worry con e luga ta. Polis ta wak nan pero no ta tuma accion, sin laga afo e dump di sushi cu tin eybanda tambe awor.
“Esey ta cosnan chikito cu por haci cu no ta costa nada pero no tin ningun movecion eybanda tampoco, no tin maneho pa maneha ful structura di caya, no tin nada,” segun Tieleman. E problema di AruParking tin un aña practicamente cu a keda introduci bek cu partimento di sticker pero ta haci falta riba proceso di multa. Algun comerciante ta pro, algun contra, y cada hende tin nan mesun opinion riba dje. “AruParking a cuminsa bek pero no ta den funcion pasobra no tin control. Tin hende ta paga, y otronan no ta worry mes pa paga, ta free for all. Ni cu of sin, no a haci diferencia den fluho di hende den caya,” Tieleman ta comenta.
Caya ta un puzzel di mil pida, cu yen di problema, y mester cuminsa di abao bay ariba pasobra si no ta bira imposibel pa soluciona tur e tipo di problemanan cu ta existi den cayam segun e comerciante ta expresa.
