Si bo wak e caya Columbusstraat berdad no [por nenga cu el a haya un embeyecemento, pero no tin nada den e caya. E no a yena cu nada extra, no a bin ningun extra comerciante of restaurant. A bin cu bon iniciativa pa trece hende bin traha den caya cu oficina di Freezone pero esey ta un comienso hopi chikito cu si mester sigui cu ne pa bin cu un cambio di berdad. Esaki ta e pensamento di e comerciante di Caya Grandi Frank Tieleman, kende ta enfatisando cu no tin nada tumando luga.
Gobierno a anuncia cu fase dos lo cuminsa pronto, unda antes tabata Asian Delight y vecindario lo haya un revitalisacion. Nos a puntra Tieleman si esaki ta algo cu ta pensa lo yuda of cu kisas lo debilita e postura. “Debilita no necesariamente, pero e no ta bay yuda caya. Su focus ta restaurant y F&B, ken e ta bay atrae? Cual ta bon, bunita, pero caya como comercio of como otro cos ta diferente. Mester cambia e idea di kico ta caya, pasobra e idea bieu di tienda cu ta bende cos no ta funciona mas. No por sigui forsa esaki, mester pens’e bon pa cambia ful e concepto.
E concepto di Wilhelminastraat ta bunita, segun Tieleman, pero esaki no ta bay haci ningun efecto riba Caya Grandi. Oranjestad a haya su tram, awor ta pensa di bin cu un Ferris wheel tambe pa Oranjestad manera nos a publica algun siman atras. E pregunta ta si esaki ta cosnan cu lo trece mas hende.
“Dificil pa bisa, e no ta bay trece ningun cambio pa caya como centro comercial. E ta trece mas bishitante. Pero si ta focus riba F&B, esey so no por tene caya na bida, mester ta combinacion di mas cos.”
E idea di inversionista pa haci edificionan condominio, ta parti di idea pa trece hende biba den caya. Y atrobe, no sa si e local ta un mercado cu lo biba den centro di ciudad, pero ta algo cu mester bay busca mas informacion riba dje. “Si bo ta bay depende riba un stranhero cumpra condo pa bin biba den caya, mi no sa ki efecto esey lo ta bay tin.”
