Den fin di siman tra’i lomba tabata tin tambe e show humoristico den Cas di Cultura, yama El Festival de las Risas.
P’e esaki tabata na Aruba e comediantenan Gaetano Ruggiero, miho conoci como El Che Gaetano y Pedro González , miho conoci como Don Jediondo, directamente for di Venezuela. El Che Gaetano tin 30 aña di carera y den su carera el a traha cu RCTV (Radio Rochela) cu cuacual el a traha 15 aña y tambe el a traha na Venevision. Un di su programanan mas conoci ta ‘El Boracho’ Rogebrio, cual ta esun mas conoci na Venezuela.
Den e Festival de las Risas tabata t’ey tambe e comediante Pedro González conoci como Don Jediondo, directamente for di Colombia. Tabata 20 aña pasa cu e tabata na Aruba, den un espectaculo den un club nocturno riba J.E. Irausquin Blv y e biaha aki e tabata tin oportunidad di a topa cu algun persona cu tabata den su presentacion di 20 aña pasa. Don Jediondo tin 29 aña di bida artistico y e lo celebra esaki c’un gira nacional y tambe internacional.
Vicento Cristofori tabata productor di ‘El Festival de las Risas’. Su compania ta specialisa den eventonan humoristico y cu e evento aki nan a yega cuater evento exitoso. Nan prome evento tabata ‘Humor y Gaita’, unda cu nan a trece gaita di Venezuela y tambe humorista Venezolano. Cristofori a sigui bisa cu e biaha aki nan a involucra nan mes cu e publico Colombiano. Tabata e intencion pa tres humorista presenta rib’e anochi aki pero pa un motibo of otro, na su yegada no a permiti entrada na Aruba di e humorista Jhovany Ramirez, miho conoci bou di su nomber artistico Jhovanoty.
Productor di e show aki, Vicento Cristofori a indica cu nan tin tur prueba di pago y no sa kico por tabata e motibo pa a nenga entrada n’e humorista Colombiano aki, c’un amplio carera internacional. Pero el a sigura cu lo reprograma e fecha pa asina e comediante Colombiano Jhovanoty por haci su presentacion na Aruba.
Un fin di siman yena di actividad, pero no sin controversia.
