Di parti di CCCA – Crea y Conserva Arte y Cultura di Aruba, Ferdinand Franca, docente di scol y director di teatro, a anuncia cu a pospone e musical “Ami ta un artista” pa un otro fecha.
E ta sigui splica p’awo tin e fechanan di dia prome y 2 di september y a pospone ya cu e actornan y e bailarinnan cu ta participa den e obra aki, kier un tiki mas tempo pa nan por crea y duna e publico loke t’e excelencia, ya cu mirando aña pasa a yega na un nivel asina halto y asina kier mantene tambe e nivel p’asina e publico sigui haya e excelencia, pa loke t’e parti di e musicalnan cu ta produci.
CAPUCHON CORA UN EXITO
Franca a felicita y duna e publico en general, cu a bin mira e proyecto ‘E capuchon cora’, p’e sosten grandi cu nan ta haci pa loke t’e muchanan y tambe e hobennan. E proyecto aki a culmina exitosamente, cual ta uno masha bunita mes.
Diasabra ultimo e publico a sa di disfruta y mira e nivel y calidad di loke t’e talento y creatividad di e muchanan.
KIER MAS TEMPO PA PREPARACION
Pa loke t’e musical “Ami ta un artista”, Franca ta sigui splica cu pa loke t’e parti di e hobennan mes cu ta participa, esta e elenco, nan ta pidi un tiki mas tempo, manera ya indica, ya cu nan kier duna e miho di nan mes, esta miho riba stage. Tambe como publico, ta paga 25 florin pa bin mira e obra, pero tambe ta spera un nivel halto. E no ta un musical con cu ta. Ta un musical di calidad. P’esey e hobennan tambe ta exigi di nan mes mas calidad.
Pa mas detaye lesa TREMPAN.
