Durante un ceremonia dialuna den oranan di atardi Fundacion pa Esnan cu Deficiencia Auditivo Aruba (FEDAA) a haci entrega di un donacion na Fundacion Lisette Gomes, den forma di comestibel pa yuda esnan di menos recurso.

Presidente di e fundacion Stella Montsanto tabata presente hunto cu Louisanne Yarzagaray, miembro activo di fundacion FEDAA. Montsanto a splica cu Fundacion FEDAA a organisa su ultimo actividad pa e aña aki cual tawata un cena di Gracia “ThanksGiving”, un cena pa bisa danki.

FEDAA a entrega dos macuto na Fundacion Lisette Gomes

FEDAA a entrega dos macuto na Fundacion Lisette Gomes. Click e link pa mas https://24ora.tv/33D9zd2

Posted by 24ora on Monday, December 2, 2019

Pa e actividad bunita aki a splica tur miembro pakico mester gradici y bisa danki pa tur loke a bay bon y tur loke a bay menos bon. Tambe a splica e bunita gesto pa duna un instancia, persona of famia cu menos recurso. P’esey tur miembro aunke nan tin, a trece algo di come of bebe pa asina por a yena cu 2 bunita macutu pa duna un famia cu menos recurso. Dialuna a acudi na fundacion Lisette Gomes pa haci entrega di esaki.

Fundacion FEDAA ta super contento y kier a gradici e directiva y tur su miembronan di por a logra duna e famia aki pa un par di siman algo di come y bebe. Semper corda wak rond di bo y yuda esun den necesidad.

Pa Fundacion Lisette Gomes, e ta un super bunita gesto, vooral cu ta bin cu personanan cu limitacion, cu ta instrui y siñanan, caminda nan mester conoce cu tin mas hende cu problema y un por yuda otro.

Segun Lisette Gomes, un tiki ta yuda. E famia ta super agradecido y mirando cu nos ta den temporada di duna, den nan cena di Duna Danki nan a haci esaki.

E fundacion ta gradici nan pa yuda cu e caso aki, te awe tin hende ta acerca pa yuda. Di parti di Fundacion Lisette Gomes, nan ta gradici Fundacion FEDAA, cu ta un fundacion di admira. Pa nan tampoco no ta facil pa drenta den comunidad. Mescos cu famianan cu ta pasa den necesidad pa un of otro motibo of un of otro problema. Di curason, Lisette Gomes ta bisa comunidad henter pa no husga ningun hende pa ningun limitacion. Pa duna un man y pa tur yuda otro.

Tin mas caso, segun Gomes. Ta saca un caso y dies ta sali su tras. Ta purba di yuda te caminda cu por. Bunita di esaki ta cu comunidad di Aruba ta atento. Nan t’ey pa yuda aunke cu ta cu un cos chikito. Poco dia ey a entrega un stof chikito caminda cu e famia a keda contento.

Ta detayenan cu por haci un efecto den bida di un hende, pa e ta contento, pa e ta mas trankil pasobra biba sin un stof, sin un frigidaire, sin cuminda, no ta facil. E ora ey Fundacion Lisette Gomes t’ey. Pa cualkier hende cu ta pasando den algo, Fundacion Lisette Gomes ta haci su best, naturalmente cu ayudo di comunidad.

Comments

comments