Por a tuma nota cu na Aruba tin hopi cas bashi den diferente bario. Den cierto barionan specifico ta haya casnan bashi y deteriora.
Edwin Tromp, director di FCCA a splica cu nan ta tira bista riba e casnan aki y obviamente FCCA ta interesa. Ta trata y sigui trata pa wak con por yega na e doñonan y tambe si ta posibel pa cumpra.
Tabata tin ocasion cu ta yega na e doñonan, pero no ta bende cas y ta lague pa e yiunan. Den un caso mas recien a yega di cumpra un cas via subasta, pero tabatin un persona cu a cumpr’e. FCCA normalmente ta bay na e propiedad y haci un evaluación. “Si tin famia cu kier bende cas y prijs ta aceptabel, FCCA ta mas dispuesto pa cumpra, drecha, huur of si tin mester of tin hende interesa, ta bende e casnan aki.”
Si tin hende cu ta den e situacion di problema di famia, cu nan kier sali for di nan y si tur firma t’ey, FCCA sigur ta interesa pa cumpra.
Haciendo esaki, ta drecha e bario tambe. Tin diferente cas p’ariba di brug y tambe p’abao di brug u tin mester di mantenimento. Si por logra cumpra e casnan aki sigur sigur no solamente pa FCCA, e ta bon pa Aruba mes.
