Gerencia di Fundacion Cas pa Comunidad Arubano pa e tempo di crisis tambe a sigui traha riba nan plannan. E proyectonan di vivienda no ta para pasobra e demanda t;ey. Unabes cu FCCA caba cu cierto ya caba tin hende interesa den nan, Pues prácticamente casnan no ta keda bashi.
Edwin Tromp, director di FCCA a splica cunan tin clientenan cu henter nan bida ta huur y no ta yega na un cas propio. Sinembargo tin otro grupo cu si kier nan cas y mester tene cuenta cu nan deseo tambe. Den cuadro di esaki ta construyendo cuatro edificio na San Nicolas, di 2 y 3 piso.
Nan ta spera cu e casnan aki ta completamente cla pa inicio di otro aña mientras cu e proyecto cu FCCA tin na Tanki Leendert si ta cla e aña aki ainda. Patras di aeropuerto tambe tin 80 cas den construccion dei cual un parti ta pa huur y e otro ta pa personanan di 55 aña baya riba.
FCCA ta bay sigui cu construccion den próximo aña y no ta bay den pasado manera traha 200 cas den un solo area. Ta traha riba proyectonan mas chikito, plama riba diferente area di Aruba. Ta pensa riba hendenan cu ta haya pensioen of bijstand cu kier sigui biba den nan mesun bario.
