E team di 24ora a trata di haya un declaracion di famia, un reaccion pa e sucedido dialuna anochi na un cas na Sero Pita. Un asistencia pa un homber agresivo cu na final di anochi a caba den tiramento y un persona a resulta mortalmente herida: Wilson Peña Bermudez.
Henter e famia a keda den shock, pasobra na momento cu a yama Polis a spera ayudo pero nunca cu algo asina lo sosode.
Riba Facebook por a lesa loke un miembro di famia a skirbi su pensamento, lamentando loke a sosode. El a papia di e funcion di Polis cu ta un trabou cu semper el a admira, aprecia y respeta. “Awe mi por bisa FOEIIIIII!!! Respet a caba pa boso Polis! Awe boso a kita bida di 1 persona, 1 tata pa su yiunan…. Kisas e no tawata e tata perfecto, pero den nan bista e tawata e miho Tata! Boso a laga mi dos rumannan sin nan Tata! Boso a ranca nan tata for di nan INHUSTAMENTE! Boso a laga nan wak con boso ta tira nan tata y laga nan sufri eynan sin niun contesta! Asina facil ta pa kita bida di un persona ‘inocente’? Si, famia a yama pa un asistencia di Polis. ‘Polis e amigo fiel’.”
Manera por corda, dialuna anochi Polis a bay pa asistencia na e cas di famia na Sero Pita caminda e homber ta destruyendo cos den cas. Segun e post di e familiar, nan ta cuestiona e hecho con bin cu 4 funcionario policial no por “handle” un persona cu tabata bou influencia. Tambe ta puntra di con e 4 Polisnan no por a pidi refuerso.
