E compania Armstrong Oil & Gas Inc. a informa Minister di Energia, Glenbert Croes, cu nan investigacion preliminar ta cla y nan compania a bay di acuerdo pa financia un proyecto multimiyonario di exploracion di gas y petroleo den lama rond di Aruba. E compania a identifica tres diferente sitio, caminda nan ta kere cu posiblemente lo tin un pos di sea petroleo of gas. Nan a yama e posnan Andicuri, Masbango 1 y Masbango 2.
Di acuerdo cu e investigacion cientifico haci, e compania ta kere cu por lo menos un di e posnan, esta Andicuri lo por ta hasta mas grandi cu esun yama “Perla” na costa di Venezuela. E arenan cu lo explora y cu nan ta kere cu posiblemente lo tin petroleo of gas eybou, ta keda 90% den awa teritorial di Aruba.
Minister Glenbert Croes: Aruba ta bendiciona
“Lider, nos isla ta bendiciona. Mi no por keda sin corda riba e dicho di mi tata, cu si tin 1% di chens pa logra un obhetivo, cu mester keda lucha te final. Y esey ta precisamente locual mi a haci tambe. Y awe mi ta contento di a haya e bon noticia aki cu e proceso di exploracion ta aproba y e compania lo inverti un suma cuantioso pa explora gas y petroleo den nos awa teritorial”, asina Minister Glenbert Croes a expresa na nos awe. E no por a sconde e alegria den su bos y a sigura cu e lo resa hopi pa e locual e compania ta kere cu tin na petroleo den nos suela, cu esey lo ta berdad. E mandatario ta mira ehempel den Caribe manera Guyana, unda bida di tur ciudadano a cambia asina cu a haya petroleo.
Ken ta Armstrong Oil & Gas Inc.
Na aña 1985, William “Bill” Armstrong a funda Armstrong Oil & Gas Inc. (AOG), un compania priva di exploracion di gas y petroleo, cu nan oficina principal na Denver, Colorado, na Merca. Nan ta specialisa den exploracion di veldnan grandi di petroleo y gas. Nan ta enfoca hopi awendia riba Alaska. AOG ta conoci pa a descubri varios veld grandi di petroleo, di mas cu 100 miyon bari, incluyendo esun di 2.5 biyon bari na Pikka na e parti noord di Alaska.
Bon ‘track record’
Den e ultimo tres decadanan, AOG tabata envolvi den descubrimento di riba un dozijn di veldnan nobo di petroleo, cu ta produci biyones di bari. AOG a traha tambe na The Williston Basin, na The Powder River Basin, na The Wyoming/Utah Overthrust Belt, na The Michigan Basin, na The Cook Inlet, na The Gulf of Mexico y sin lubida na The San Joaquin Valley.
AOG ta comparti su experticio geologico y geofisico den descubri petroleo y gas, door di cera aliansa cu otro companianan grandi di Merca y internacional, manera ta Repsol, Exxon, Chevron, Eni, Anadarko, Pioneer, Santos, Ker McGee y varios otro mas.
E plan pa explora na Aruba
E mision di AOG ta pa explora y explota hidro carbon, tanto riba tera como den lama, cumpliendo cu e miho standard di proteccion di siguridad y di medio ambiente. No ta mucho tempo pasa cu e compania a dicidi di crece internacionalmente, door di crea un compania subsidiario, cu nan a yama Armstrong International LLC. Eyden a inclui un ekipo specialisa di experto cu hopi experiencia, cu un track record exitoso, pa busca oportunidadnan nobo…manera t’esun aki di Aruba.
Pa awo, Armstrong International LLC lo haci un evaluacion tecnico, cu ta dura mas o menos tres pa cuater luna, pa por confirma cu tin potencial hydrocarbon den lama rond di Aruba. Despues di confirma esey, nan lo pidi Gobierno di Aruba pa duna nan e terenonan necesario pa por explora y explota pa purba yega na petroleo y/of gas den nos suela. E echo cu nan ta na Aruba ta pasobra cu, segun nan calculonan, y mirando cu a haya gas na Perla, cerca di costa di Aruba pero den lama Venezolano, cu nan ta sigur cu mester tin un of mas pos rond di Aruba tambe!
Aruba lo cobra, si haya algo
Den e acuerdo cu a cera awor entre Armstrong International LLC y Compania Arubano di Petroleo (CAP), ta bisa cu, di acuerdo cu leynan local, cu e compania Mericano lo busca financiamento pa e proceso di investigacion y exploracion. Pero, CAP lo participa activamente den e proyecto como un “key stakeholder” den exploracion, acaso e desaroya den un actividad comercial, si acaso logra descubri petroleo y/of gas den fondo di lama. Cuanto e particion lo ta, no ta conoci pa nos, pero generalmente e pais ta cobra mas for di e benta.
Lo cuminsa bora otro aña
Meta di e compania Armstrong International LLC ta pa implementa un programa acelera di exploracion. Nan lo haci prome cu tur cos, un “3D seismic survey” pa identifica e areanan potencial unda posiblemente tin petroleo. Y si tur cos bay bon, ta pensa di cuminsa coba e prome buraco, den dos aña despues di firma e contract, pues lo ta na aña 2025 mas o menos. E compania ta sigura cu e ekipo cu nan lo manda pa Aruba tin un amplio experencia den maneha proyectonan exitoso. Nan ta set-up un operacion sigur y eficiente na nos isla, negociando tur e contractnan necesario y ehecuta e proyecto mas lihe posibel.
E proyecto tin varios fase
E proyecto lo ta parti den varios fase. E prome dos lunanan, esta augustus y september 2023, a uza pa negocia cu CAP y cu Gobierno di Aruba. Esey awor ta tras di lomba. E siguiente fase a cuminsa na november 2023 y lo dura te cu februari 2024, unda ta evalua e aspectonan tecnico pa e 2D seismic. Ta kere cu entre april te juli 2024 lo traha riba e “3D seismic Acquisition”. Simultaneamente, entre mei y juli 2024, lo tene un destaho publico pa scoge cua compania lo traha cu ne pa haci e trabou di “seismic” den lama na Aruba. Na september lo cuminsa mobilisa un barco pa Aruba, cu ta esun cu lo haci e trabou di investigacion sismico, cu lo tuma luga otro aña entre october pa december. Entre januari pa juni 2025, lo procesa tur e investigacionnan sismico haci den lama. Ta programa entre october 2025 pa januari 2026 pa tuma e decision si ta “drill” of no. Si e decision ta positivo, anto na januari 2026 ta cuminsa set-up e base operacional riba lama. Y si no tin contratiempo, na luna di april 2026 ta spera di cuminsa bora pa explora pa gas y/of petroleo. Esey lo dura te cu luna di juni 2026.
Repsol a explora caba na Aruba
No ta mucho tempo pasa, sino tabata na aña 2018 cu e compania Repsol a explora un buraco caba rond di nos isla. E tempo ey a cera un consorcio entre e compania Repsol di Spaña y Total di Francia. Mester menciona cu, ambos compania ta convenci cu tin petroleo y gas den fond’i lama. Pero, a discuti cua di e cinco buraconan, cu nan a señala cu posiblemente por tin gas y/of petroleo, lo coba prome. Total tabatin un preferencia mientras Repsol a pensa otro. Na final, a bay tras di e “gamble” di Total y a dal den bashi, pues a coba un “dry hole”. Esey a pone cu e dos companianan a rabia cu otro y Total a bula for di e consorcio y Repsol no kier a sigui su so den e exploracion. Na tur nan a inverti mas o menos 80 miyon dollar den e proyecto aki, cu tabata parti den investigacion y exploracion.
Tres aña pasa a stop di traha cu Repsol
Tabata dia 6 di januari 2020, cu Gobierno di Aruba a anuncia oficialmente cu Compania Arubano di Petroleo (CAP) a informa nan cu Repsol a stop cu e proyecto di exploracion di gas y petroleo den fondo di lama di Aruba. Repsol a laga sa e tempo ey di lo no sigui cu fase # 4 di e acuerdo firma cu CAP. Dicho acuerdo tabata firma na december 2012 y a caba dia 30 di november 2019, despues di shete aña di exploracion. E decision pa stop e proyecto a cay despues cu no a haya nada ora a coba e prome buraco, yama “Bon Bini-1X”, situa na e parti nort di Aruba, cu tabata un “dry hole”. E resultado aki tabata relaciona cu e investigacion sismico haci entre aña 2014-2015. E tempo ey a dicidi di reevalua e otro buraconan cu ainda nan tabata pensa cu lo por ta prospectonan, cu por tin gas of petroleo den nan, pero como cu Repsol no a logra haya un bon partner pa forma un consorcio y comparti e gastonan halto mara na e proceso di exploracion. Cu e realidad ey den mente, a opta pa “pull the plug”.
Tocante Compania Arubano di Petroleo N.V.
Dia 15 di mei 2006 a funda Compania Arubano di Petroleo N.V., situa na Italiestraat 46, den e mesun edificio cu Utilities Aruba N.V. E prome director tabata Armando Curet. E compania ta 100% di Gobierno di Aruba. Actualmente Jeremy Croes ta director, mientras cu e ta conta cu un Hunta di Comisarionan, den persona di Henry Baarh, Michael Raymond, Loetico Hermans, Ton Rojer y Gos Oduber.
