E informe haya tabata cu pa fin di februari e procedura lo mester ta cla pa e planta di purificacion di awa RWZI mester ta pasa den man di Utilities Aruba N.V. Ta mesun cos a indica aña pasa. Maart, 2023 a pasa y nada. Y awo ta yegando final di februari (2024) y atrobe ta parce cu e lo no keda cla.
Den tur esaki e pregunta ta: Ken mester bay paga pa e gasto aki momento cu “privatisa” e RWZI? E reaccion di pueblo ta cu sigur nan no tin espacio pa carga mas peso.
Minister di Naturalesa Ursell Arends cu palabranan firme a bisa cu esaki ta algo cu nan a scoge pa no haci na e momentonan aki. Cu nan por haci’e ta berdad pasobra den ley ta para cu gobierno por cobra Rioolheffing. “Pero a dicidi di no bay cobra esaki.”
E ta splica cu durante e periodo di Covid-19 unda cu Aruba a cera su frontera pa tres luna, a probecha di e temporada aki pa colecta data. Ta papia di informacion di e cantidad di awa cu ta yega na RWZI na Bubali. Asina a saca afo cu 70% di e awa cu ta yega na e planta aki ta procedente di sector hotelero, condominium y di e restaurantnan.
Ta pa e motibo ey cu a yega na e formula cu e sector aki mester paga pa e gastonan di operacion di RWZI. “Si den futuro otro gobernante dicidi di bay cobra pueblo, ta nan asunto. Na e momentonan aki e miho structura ta pa cobra esunnan cu mas uzo ta haci di e sistema di RWZI.”
Con e cobransa ta bay tuma luga ta desconoci. Of por lo e menos no sa ainda. Segun e mandatario a bisa den declaracion na 24ora.com, cu na e momentonan aki ta deliberando ki formula ta miho. Tin diferente escenario, manera inclui esaki den e pasashi; cobr’e na frontera of cobr’e den cualkier un di e heffingnan cu tin actualmente. “Nos ta studiando esaki awo hunto cu huristanan di gobierno.”
Pa RWZI su operacion, mester 20 dollar di cada turista, segun e business plan traha. Awo mester dicidi con ta bay colecta e fondonan aki.
