Generacion ta bin generacion ta bay, pero casa paso of decision cu bo tuma ta marca bo historia. Tur decision tin consecuencia. E simia cu bo sembra lo bira e cosecha cu bo lo ricibi. Un cos ta sigur di esaki lo bo no libra di dje. Bo historia ta bo mes ta skirbie y lo keda graba pa bo generacion. Bo a bin sin nada na e mundo aki y lo bo no hiba nada tampoco ora bo momento yega cu bo wowonan lo cera pa semper. Recuerdonan lo keda pa un tempo paso nan tambe lo yega un dia cu lo disparce.
Locual cu a pasa den nos “stadhuis” awe no a cay pa nos di partido Curpa como sorpresa. Nos ta corda cu dia 8 di September 2016 e conocido amienda 7 cu a haya sosten di tanto partido AVP como partido MEP e tempo ey. No mucho tempo pasa, pa ser exacto dia 1 maart 2021, a aproba nos codigo civil caminda e geregistreerd partnerschap lo haya mes derecho cu un matrimonio. Pueblo no mester lubida cu den su mayoria el a wordo acepta door di partidonan MEP, POR, RED y AVP.
E tristo ta cu parlamentarionan di MEP por a impedi e reunion aki tuma luga y evita pa e ley wordo aproba. Pakico mi ta bisa esaki ta pasobra prome cu e reunion a bin riba punto agenda pa wordo trata den nos parlamento. Mi persona tabatin un combersacion cu un parlamentario y nan tabata sa di antemano cu si e ley yega parlamento lo e wordo aproba. Pasobra nan a sondea opinionnan caba di e parlamentarionan y cu nan lo no por par’e.
Pio di esaki ta sabiendo cu no tin boluntad pa para e ley aki nan no a haci nan esfuerso pa impidie. E reunion aki por wordo impedi pa parlamentarionan Tevreden y Guedez. Nan mester a bisa e presidente di parlamento pena la bida pone codigo civil riba agenda pa e wordo trata den nos parlamento. E tabata ta na nan alcance pa wordo impedi. Nos tur por corda cu a vota 17 na fabor y 4 contra.
Nos ta e unico partido cu for di un comienso nos a expresa cu pa nos di partido CURPA contra di tur ley cu ta bay contra leynan di Dios. E leynan di hende nunca por bay di impugna cu leynan di Dios. Si nos kier proteha nos pais contra di maldicion anto nos mester por sa cu leynan di Dios ta sagrado.
Hendenan sin temor di Dios y cu ta sinti nan mes nan superior na Dios ta bay contra leynan di Dios y despues ta pidi Dios bendiciona bo. Un palo malo nunca lo por duna un bon fruta ni vice versa. Laga bo “si” ta “si” y bo “no” ta “no”. E gañado- y manipuladonan tambe tin nan castigo. Partido CURPA ta insisti cu nan mannan ta limpi y nan a lucha y para firme te final.
E Pastoornan cu a dividi nan iglesia na 2017 y 2021 ta esunnan responsabel den cara Dios. Nan ta esunnan cu no por lanta mannan santo dilanti Dios y no tin curason puro. Nan mannan ta mancha cu pica. Esunnan cu a maldiciona partido CURPA y bisa cu ey bao nan lo keda, nan ta esunnan cu lo keda eybao pa apoya maldad. Esunnan cu a bisa cu mi no tin etica, ta netamente nan no tin etica pa apoya maldad. Boso ta causa di e desaster aki pasobra boso mester sa miho y boso bo a saca ningun man pa impedi e desaster cu boso ta forma parti. Esaki lo mester keda riba boso consenshi pa apoya maldad.
“Mi mester bisa danki na e pastoornan Catolico cu a laga nan bos resona cu nan ta contra y a para firme te ultimo. Na 2016 boso a para banda di nos y nos a para banda di boso. Boso ta di bendicion y Dios lo recompensa boso. Un danki di curason pa boso apoyo. E resultado di eleccion cual tabata uno fraudulento y tambe a keda demostra cu Aruba a bira lomba pa Dios. Nos lo sinti e consecuencia sigur. Bo historia ta bo mes ta skirbie”, asina Eric Ras, lider di partido CURPA a termina bisando.
