Mervin Wyatt-Ras: Ta inaceptabel cu gobierno ta tuma medida pa famia di criansa

Parlamentario drs. Mervin Wyatt-Ras den un entrevista a trece padilanti cu ta inaceptabel cu gobierno ta tuma medida riba famianan di criansa. Wyatt-Ras por a tuma nota di un articulo den medio di comunicacion cu Departamento pa Asuntonan Social ta informa cu personanan cu tabata haya “pleegkinduitkering” no ta haya e ayudo financiero extra mas c’un persona normal den bijstand ta haya ora ta bay scol regular durante dia. 

Alabes e departamento a informa cu pa algun aña caba Seccion di Bijstand no tabata ehecuta articulo 7 a. di bijstand corectamente y cu desde aña pasa nan a “trek recht” e articulo aki y ehecucion di dje. E 250 florin extra cu esnan cu tin yiunan di criansa tabata ricibi ta e “schooltoelage” y nan a hay’e te cu 9 di september 2021. Pues e mayornan di criansa lo haya solamente 200 florin pa nan yiunan di criansa, enves di 450 florin. 

Segun Wyatt-Ras netamente den e periodo aki cu un cantidad di nos ciudadanonan tin’e dificil y a perde trabou di cual tin diferente no ta haya un bijstand y pues no ta cay bao di e articulo 7a. ta bin cu un medida asina riba lomba di e mayornan cu tin consecuencia riba e muchanan. Muchanan cu bira un “pleegkind” ta muchanan cu no por biba serca nan mayor biologico pa motibo di un of otro problema na cas, manera p.e. descuido, abuso, maltrato y adiccion, y tin di nan tin diferente dificultadnan of retonan psycho-social y/of di comportacion dor di cual ta rekeri pasenshi, dedicacion y hasta guia tanto di e mucha como di e mayornan di criansa. Ademas tin di e muchanan cu ta den un famia di criansa mester di ayudo special pa cu nan siñamento. 

Un ayudo of sosten financiero pa e mayornan di criansa no solamente ta haci posibel cu e yiu di criansa por haya mas oportunidad sino alabes cu e por ta un incentivo pa e famianan cu no tin mucho entrada por tuma e stap di duna un mucha un oportunidad di biba den nan famia y haya amor, calor, cariño, proteccion y educacion cu e mucha no por haya den su propio famia.  Net awor cu salud mental di nos mucha- y adultonan ta delicado, en bista di COVID-19 y su consecuencianan riba e relacionnan familiar, gobierno ta tuma e decision di corta den nos muchanan vulnerabel y nan mayornan di criansa. 

Diferente mayor cu no ta contento a acerca Wyatt-Ras, algun tabata hasta desespera. Nan ta haya cu gobierno no por sigui cu tal decision descabeya cu sigur lo perhudica specialmente muchanan cu ya caba ta vulnerabel. 

Parlamentario Wyatt-Ras a manda diferente pregunta pa e minister y ta spera di haya contesta pronto. El a puntra si e Minister por informa Parlamento dicon of kico ta e motibonan cu awor cu un cantidad di famia a perde trabou ta corta of tuma medida den e grupo di mucha aki cu por ser considera como vulnerabel den nos comunidad? El a puntra cuanto famia ta bin na remarca pa e yudansa aki y ki suma esaki ta encera? A puntra si a scucha opinion di departamentonan/instancianan encarga cu famia di criansa pa sa ki ta nan opinion al respecto? Cual tabata e resultado di e consulta? 

A aproba Fondo di Crisis (Crisisfonds) cu e meta pa yuda y sostene muchanan den situacion vulnerabel, manera entre otro negligencia, abuso y maltrato. Wyatt-Ras ta puntra y cuestiona dicon e fondo aki no ta yuda den e caso aki? Con “Crisisfonds” por yuda pa evita cu ta tuma e medida inhusto y inhumano aki? 

Parlamentario Wyatt-Ras ta spera cu e minister en cuestion por tuma e decision corecto y no perhudica e famianan aki cu di bon boluntad kier yuda un mucha y dun’e un di dos oportunidad.