Nos por a mira cu gobierno a bolbe saca bono na balor di 40 miyon florin cu a cera 5 di october 2022. E aña aki segun informacion den prensa gobierno a fia 440 miyon florin. Nos pueblo ta sinti e peso di un gobierno desastroso y cu no sa con pa administra placa di pueblo y mas pio ainda ta cu nan no sa kico mas pa haci. Algun puyito a cuminsa sali for di e caso di Arubahuis y ta spera cu di un ora pa otro e Pandora box ey lo bula habri. Nos di partido Curpa tin e siguransa cu e maldadnan ey lo no keda scondi pa pueblo y tur cos lo bay sali na claridad. E disgusto memey di pueblo ta grandi y tur caminda bo ta tende ki dia nan ta tuma honor nan mes y bay gobernador y entrega retiro di e gobierno.
Pa busca moda pa tapa nan mal maneho awor kier bin cu embeyecemento di e trapi di Hooiberg. E Water Zuiverings Installatie na Bubaliplas tin mas cu un aña para y no ta tende nada pa trece solucion y pa asina nos no mester yora malay pa falta di maneho. Tin un rapport desastroso a sali na claridad y ainda gobierno ta sinta cu su mannan crusa. Asina ta papia cu tin bienestar di nos isla na pecho. Situacion na Serlimar, Arubus y Postkantoor ta den mesun situacion.
Fuera di tur e medidanan pueblo ta sinti e aumento drastico di awa y electricidad y por papia di un aumento di 100%. Riba dje gobierno a implementa e eigenbijdrage di AZV. Principio di 2023 BBO ta bira 7% y kier pa nos grandinan ta contento cu un miserabel reparatietoeslag di 45 florin. Gobierno ta cobando un graf y moda e situacion ta bayendo for di man, nan mes lo wordo dera den dje.
Asina e gobiernonan socialista rond mundo ta kere cu nan por keda oprimi pueblo, mientras cu nan ta biba bon. E agenda globalista ey lo bin abao, pasobra pocopoco pero sigur pueblo su wowonan lo habri y lo no bay soporta e abusonan cu ta tumando luga. Kier of no e transformacion lo yega y lo ta fin di e gobierno aki pa nunca mas mira nan. Historia so lo keda di un gobierno cu a maltrata su pueblo.
Nos madre patria Hulanda tambe e situacion no a cambia. E boeren ta protesta pasobra kier kita nan terenonan. Nos ta kere cu e cos aki ta un bofta den cara di un pueblo inteligente. Gobierno Hulandes kier bay construi flats pa e stranheronan bin biba eynan. Esaki ta e open border policy di e agenda 2030 y esaki ta hinca den e coho cu nos gobierno a firma tambe. E aña aki so tin como 160 mil stranhero a bay biba na Hulanda y esaki ta e motibo cu tin scarsedad di cas na Hulanda. Na e paisnan cu tin partido socialista na poder ta haci mesun cos. E simpel motibo ta pa destabilisa e pais pa nan keda na poder y asina e pais ta perde su identidad.
E mayor rosamento (deforestacion) den historia na Hulanda a tuma luga pa e proyecto di biomassa. Hulanda a hinca 11.4 biyon di euro pa converti e centralnan di energia pa biomassa. Tur esaki ta pa e cambio climatico y Hulanda ta hinca 1000 biyon euro den e fundacion di cambio climatico di Gates.
Aki na Aruba solamente partido Curpa ta papia contra di e metanan di desaroyo sostenibel di agenda 2030. Esaki ta e plan global cu e gobierno di Aruba a cuminsa cu ne dia 23 di september 2015 y awe e gobierno aki ta sigui cu ne y nos parlamentarionan di coalicion ta sostene ciegamente, a pesar di tur e consecuencianan negativo cu e tin pa nos isla. Un di e diesshete puntonan hinca di e metanan di desaroyo sostenibel ta contra di e bienestar familiar. Gobierno ta gaba cu Aruba a bira e prome isla den Caribe di a firma e Common Trust Network di World Economic Forum. E mesun organisacion aki kier controla mundo y su lema ta: “lo bo no tin nada y lo bo ta feliz.” Nos di partido Curpa ta sigui confia den Dios paso ta solamente cu sabiduria di Dios nos lo sali di e situacion aki.
