“Mi ta hopi satisfecho cu e experiencia di diasabra cu a pasa” asina Deaxo Croes a bisa ora cu el a yega
Baby Beach banda di 3:30 di atardi. Ta interesante pa nota cu Deaxo a cuminsa e trayectorio banda di 2:30 di marduga, cu ta un ora basta inusual ora pa landa tempo largo asina. E trayectorio di diasabra a dura casi 14 ora.
E motibo cu a landa den marduga tabata pa Deaxo custuma cu loke lama anochi ta trece cu ne; loke e ta bay afronta tambe ora cu e landa di Boneiro pa Corsou. “Cuminsa marduga cu e trayectorio di landamento ta pa mi custuma cu scuridad di lama, e biento, coriente y ola.
E intencion ta pa mi haci mescos ora mi sali marduga for di Boneiro pa Corsou”. E experiencia a mustra cu den oranan di anochi e lama tabata mas calmo, y na midi di e landamento pa Baby Beach, e lama, coriente y ola a bira mas brabo.
Un momento hopi emocional durante e trayectorio a sosode na Mangel Halto, Pos Chikito, unda un publico grandi a acumula y muchanan como parti di nan training di landamento a compaña Deaxo un rato den lama rumbo pa Commandeursbaai. E tabata un bunita bista cu ta demostra cu lama por ta un medio importante pa nos desaroyo sano como comunidad.
Banda di 3:30 di atardi Deaxo Croes a yega Baby Beach, cansa, pero satisfecho. “Mi kier a gradici nos team completo pa e entusiasmo, pasion y dedicacion pa e logro di awe”, asina Deaxo a bisa despues di a sali for di lama.
“Awor, nos bista ta pa Boneiro y Corsou, dia 19 di november. Tur nos esfuerso di landa y tur loke ta bay hunto cu esaki ta pa nos duna un aporte chikito na algo cu ta mishi cu nos tur, esta cancer. Un apelacion grandi pa henter nos comunidad, pa haci un donacion na e fundacionnan di cancer”, Deaxo a finalisa.
Cu Punta pa Punta tra’i lomba, e enfoke di Deaxo y su ekipo ta pone awo riba e fecha 19 di november, ora cu e lo cumpli cu su promesa di ta e prome persona pa landa for di Red Slave na Boneiro pa Oost Punt na Corsou; un total di 53 kilometer.
E sacrificio personal aki ta algo cu Deaxo a bin ta prepara p’e fo’i 2020 cu e meta di encurasha tur hende pa sostene e trabounan di prevencion di cancer haci pa Fundacion CORESA Aruba, Kanker Fonds Bonaire y Caribbean Prevention Center Curacao.
Crossing for Prevention ta cuminsa cu su accion pa promove y encurasha donacion pa e fundacionnan di cancer desde awe. Keda pendiente pa mas update den e simannan venidero. Ya donacion ta posibel y ta bay directamente na e fundacionnan. Pa tur informacion relaciona cu Crossing for Prevention y con abo por aporta, por fabor bishita: www.crossingforprevention.com, of e pagina di Facebook: Crossing for Prevention.
Un danki special ta bay tambe na Aruba Bank, Orco Bank, ASD, Cas Bon, Kooyman BV, Sun Bum, HBN
Law & Tax, Alimenta, BITE! Communications, CR38TE, Verbum Works y demas partners cu ta aportando.
