OTRO FIASCO DEN GOBERNACION CU IMPLEMANTACION DI “FASE”. Nos di partido Curpa a lesa e rapport di Algemene Rekenkamer y e conclusion cu nos por saca ta cu tabata tin free for all cu otorgacion di “FASE”. E ta un otro berguensa con a implementa “FASE”, pero otro ehempel di un gobierno cu no tin vision y ta traha sin pia y sin cabes. No tin mas despensa pa e forma desastroso cu ta goberna nos isla y pa colmo den momentonan di crisis. Partido Curpa ta considera e acto bochornoso aki e ultimo druppel den e hemchi. E gobierno aki no tin pia pa para riba y mester bay cas. Nan no por papia di integridad pasobra nan no tin e.
E rapport di Contraleria General ta hopi explicito kende ta e ministernan responsabel pa e fiasco di “FASE”, esta e minister di finanzas y e minister di asuntonan social. Ta señala cu no tabata tin informacion accesibel di un forma central con a otorga “FASE”. No tabatin meta concreto y nunca a bin cu un evaluacion. Tin papia di 18.611 a haci peticion pa FASE di cual a honra 3013 di e peticionnan aki. Esunnan cu a bin na remarca ta personanan cu a perde parti of ful nan salario por a sollicita pa “FASE”. Pensionadonan cu ta traha tambe a bin na remarca pa “FASE”. Un plan di evaluacion nunca a wordo ehecuta. Incomprendibel cu depues di 18 luna desde introduccion di “FASE” no a introduci un cuadro legal pa esaki. No tabata tin checks & balances.
Minister di finanzas y minister di asuntonan social mester bin cu un ley mas pronto posibel pa regla e asunto di “FASE” pa den futuro e no ripiti y pa tin metanan y condicionnan cla. Mester preveni of detecta mal uzo y uzo si presenta un calamidad nan inapropia. A otorga miyones di florin sin un base legal. Mirando cu ta den un tempo di crisis ta haci cu e riesgonan pa corupcion y fraude ta mas halto. Esaki ta cosnan cu sigur nos no por descarta mirando cu e minister a core campaña cu “FASE”. Tanto e ministernan y e parlamentarionan mester tabata den estado di alerta y mester tabata cauteloso cu fondo publico y asina garantisa e principionan di bon gobernacion. Lamentablemente esaki tampoco a tuma luga.
E colmo de los colmos cu e minister encarga no ta comenta rib’e accionnan cu e lo a tuma a base di recomendacion di Algemene Rekenkamer. Tampoco ni sikiera ta bisa con lo bay soluciona e deficiencianan constata y di e forma aki nos pais ta miho prepara pa futuro si presenta un situacion similar. Nos di partido Curpa ta constata cu e situacion aki ta hopi grave y e asunto aki mester bin un investigacion profundo con a haci mal uzo di placa di pueblo. E miho cos cu e gobierno por haci ta entrega su retiro na gobernador paso un gobierno asina no tin confiansa mas di nos pueblo.
Lider di partido Curpa
Eric RAS
